Mõnistõ muusõum' Kuudsil uut põhikooli-iäliidsi latsi 15. süküskuu pääväl linapääväle, midä peedäs joba kümnendät kõrda.
Linapääväl kõnõldas, kuimuudu om talun läbi aastasatu käünü lina ja kanepi kasvataminõ. Näüdätäs, kuis käü linnu kolk'minõ käsilde ja hobõsõga, kuis linnu rabatas, kuis linast lang saa ja kuis tuu ildamba rõivas koedas. Kaia saa ka villadsõ langa värv'mist, kudamist, vüütegemist, kalavõrgu poim'mist ja mitmit muid asju. Linatöid näütäse ette paikligu vanõmba inemise, kel om viil linatüü nuurusaost meelen.
Muusõumioppaja Ruusmaa Lagle selet', et latsõ saava kõkkõ esi uma käega perrä pruuvi ja valmistettü as'a perän kodu üten võtta.
Lagle kõnõl', et latsilõ om alasi kõgõ inämb miildünü vokisõkminõ: «Esieränis pois'kõisilõ, näid ei saa kuigimuudu voki mant är! Poisi ütlese, et tuu om nigu gaasipedaali sõkminõ! Ja kangakudamisõga om niisama.»
Ku kooli-klassi tahtva linapäivä kaema minnä, sis piässi nä umast tulõkist innemb muusõummi teedä andma.
Fastrõ Mariko |
