Minevä nädäli lõpun otsust' Vabariigi Valitsus, et Eestin võetas kaitsõ ala 44 vahtsõt luudusõ hoitmisõ piirkunda, noist pia poolõ omma Võromaal.
Võromaal võeti kaitsõ ala 20 hoitmispiirkunda, sääl seen 11 järve ja kuus jõkõ, kogopinnaga 1375 ha. Neo omma Kaasjärve, Karsna järve, Kubija järve, Kärnjärve, Lasva tammiku, Lõõdla järve, Majori järve, Pabra järve, Peetri jõõ, Piusa jõõ, Piusa-Võmmorski, Pullijärve, Pärlijõõ luha, Pärlijõõ, Rõuge jõõ, Tamula järve, Uhtjärve, Vagula järve, Vaidva jõõ ja Võhandu jõõ hoiuala.
Et noidõn kotussin om luudusõ-väärtüisi, sis omma neo ka üle-Euruupalidsõn kaitsõaladõ võrgustigun Natura 2000.
Hoiuala oma mõtõld luudusligõ järvi, mõtsatsidõ niitõ, vannu lagjaleheliidsi mõtsu, kuusistigõ, jõki, ujjõ ja tähtside elämiskotussidõ kaitsmisõs. Neo avitasõ alalõ hoita ka Lõuna-Eesti luudusõ umaperrä.
Är om keelet naidõ elämiskotussidõ ja kasumiskotussidõ häötämine ja tsurk'minõ, ka kaitsõ all olõvit tsirgu-, kasvu- vai eläjäsortõ tohe-i väega sekä.
A inemise võiva iks egäl puul hoiuala pääl kävvü, kor'ada marju-siini, jahti pitä ja kalla püüdä.
UL |
