|
| | Tulõva võro- ja mulgikeelidse raadiosaatõ |
Tulõva tõsõpäävä, 6. süküskuu pääväl kell 17.15 saa Vikerraadiost kullõlda edimäst mulgikeelist raadiosaadõt, nädäli peräst (13. süküskuu pääväl) võrokeelist saadõt.
«Teemi Lõunõ-Eesti saatit aasta lõpuni, ku kõik' häste lätt, sis jakkami,» kõnõlõs saatidõ projektijuht', Vikerraadio päätoimõndaja Rõõmusõ Riina. «Plaanimi pruuki mulgi ja võro kiilt sõnomidõ, intervjuudõ, ka märgotuisi tegemisel, tahtnu tuuga herätä ka noorõmbidõ inemiisi huvvi uma kandi keele vasta.»
Tä ütel', et ku saatõtegijä omma inämbüisi noorõmba inemise, sis om egä saatõ tegemise man vaia appi võtta ka vanõmbat rahvast, kiä mõistnu noorõmbide keelepruuk'mist parõmbas tetä.
Võro- ja mulgikeelidse saatõ pikkusõs om säidse-katõssa minotit, kõgõpäält tetäs tsõõr' pääle umakandi tähtsämbile sõnomilõ, perän om kas intervjuu mõnõ paikligu inemisega vai kommõntaar' häste tuntu võrokõsõ-mulgi käest.
Rõõmusõ Riina sõnno perrä valitas vällä säändse uudissõ, miä võinu huvvi pakku ka näütüses saarlaisilõ – Lõunõ-Eesti saatõ omma kuulda üle terve Eesti.
Tä luut, et ka tõisin Eesti paigon elävä inemise saava iks võro ja mulgi keelest inämb-vähämb arvo.
Mulgikeelitsit uudissit nakkas lugõma Ilvesse Kristi, saatõjuht' om Halliku-Konnula Airi.
Võrokeelidse saatõ nakkasõ olõma samal pääväl Uma Lehe vällätulõkiga. Edimäidsi võrokeelitsin võrokeelitsit saatit tegevä Uma Lehe tegejä.
UL | | |
|
|
| Kae, miä ütel´!
Aitüma!
Maailmameistri Värniku Andrus spordireporteri õnnõsuuvõ pääle. (ETV)
| |
| |
|
|