Võtami
ristipuiõ kaitsõs jõu kokko!
Rahvaluulõdoktor'
ristipuiõ uurja Kõivupuu Marju om väega suurõn murrõn,
miä saa ristipuiõst, miä olõ-i joht määndsegi kaitsõ all
ja omma RMK mõtsaragomis-plaanõn seen. Puhtidõ aigu puu
sisse risti ragomisõ kommõ om terven ilman alalõ viil
õnnõ Kagu-Eestin.
Tuu ristipuid pästä-i, et
vanarahvas ütles: kiä ristipedäjä maaha rago, jääs
rassõlt haigõs vai koolõs es'ki är. Kohaligu mõtsamehe
avvustasõ ristipuid (inemise hing iks all!) ja saag'
jääs puiõ sisse löömäldä, a ütsigu puu jää-i lakõs raot
raendu veeren tuulõ käen kavvas püstü. Ja ku ristipuiõ
ümbre jää-i inämb mõtsa, omma puu viil õnnõ vana kombõ
mälestüsmärgi, mitte inämb kommõ esi.
«Mi ei tohessi olla nuu,
kiä ragova katski lüllä, miä hoitva meid üten ketin
iinelänüide inemiisiga. Mi olõmi näile uma elu võlgu ja
tuud võlgu saa mi tasuda veidükenegi tuudmuudu, et
näütüses ei lähä harvesteriga pühäpuid maha võtma,»
hoiatas Kõivupuu Marju.
Või luuta, et ku ristipuu,
päämädselt pedäjä, kaitsõ ala saava, olõ-i RMK-l midägi
tuu vasta, et ristipuiõ ümbre väiku mõtsaviir' alalõ
jättä. A tuus piät paikligu inemise valla-ammõtnikkõ
abiga jõvvu ühendämä ja muinsuskaitsõammõtilõ palvõkirä
kokko pandma.
Kõivupuu Marju ütles, et om nõun tuun as'an egätepiten
avitama ja ku vaia, ristipuiõ kaitsõs esiki allkirju
korjama. Uma Leht kuts kõiki valdu, kink maa pääl
ristipuid lövvüs, noidõ kaitsmisõ hindäle süämeas'as
võtma.