Vinneaigsõ palvõtunni
Ku ma olli umbõs 10-aastanõ, võtiva imä
ja esä minno üts'kõrd üten palvõtunni naabridõ poolõ.
Palvõtunni olli külh är keeledü, a inemise kävevä kokko
ja kuuliva jumala sõnna. Kokko käüti Päivora tallo
naabri-Tamaara poolõ, kiä om parhilla üle 80 aasta.
Neo olli väega ilosa õdagu. Rahvast oll'
tarõ alasi täüs, iks üle katõkümne inemise. Kõigilõ
pakuti istõt ja tuudi pikki pinke tarrõ, ku vaia oll'.
Tsolgost, Kannult, Paidrast, es'ki Kivijärvelt ja Kuulma
küläst tulli inemise kokko.
Jõulupühhi puul'päävä olļ tarõ rahvast
kõgõ rohkõmp täüs, a käüti ka edimädsel jõulupühäl,
tõsõl jõulupühäl, vana-aastaõdagu, munapühhi ja
suvistõpühhi aigu – ütesõnaga kõiki kerigupühhi aigu.
Palvõvelle käve pall'o aastit
Palvõvelle olli Narusk Holvandist ja
Kiik Pardsilt ni näil oll' alasi üten ka kats' naist,
kiä aviti laulda. Neosama palvõvelle käve palvuisi
pidämän ka Plaki Anni puul.
Tamaara ütel', et võtt' näid vasta
üts'tõiskümme ja puul' aastat ja et nä olõssi viilgi
käünü, a haigusõ ja surm võti järjest näid är.
Päivora talo pernaanõ kõnõl', et es'ki
Põlva kerigu opõtaja Kimmel käve kõrra palvõtunni
pidämän, a rohkõmb es tohi tä tulla, et ei tohtõv naada
müüdä külli käümä, säädüs ei lupav. A palvõvelle võisõva
kül kävvü, kon näid iks vasta võeti.
Jõulupühhi aigu oll' kuuś tarrõ tuud ja
küündlegi palliva külen ni kuusõhõngu oll' tarõ täüs,
ahi oll' kütet ja palitugi võeti säläst är. Nuu olliva
üte ilosa õdagu, selle et ega koton es olõ ka õdagist
õkva midägi tetä, telekat es olõ viil meil.
Õnnõ esä kullõl' raadiot
Akudõga raadio oll' külh olõman, a tuud
kullõl' õnnõ esä õdagist – Ameeriga häält ja pühäpäivist
Soomõst kerikut. Meil es lupa esä kellelegi kõnõlda, et
kullõs Ameeriga häält – egä kõrd iks ütel', et panti jäl
segäjä undama.
Esäkene puhkas joba üle katõkümne aasta
Pindi surnuaian. A inne surma tä ütel' meile nii, et
aigu viil lätt, a ega seo seto siiä riiki kül ei jää,
pankõ tii latsõ tuud tähele, miä ma teile ütle.
Nüüd ma või är kirota timä ettearvamisõ,
miä omgi täüde lännü. Ma arva, et ku esä seod ello
tiiässi, sõs tä käänässi kirstun õkva tõsõ küle kül. Esä
arvas' seod ka ette, et meile tulõ sinine-must-valgõ
lipp tagasi lehvümä.
Riitsaarõ Laine Paidrast
|