Aig muut inemiisi, a
midägi umma jääs iks alalõ
Umast elost veere pääl
Karro Silvi, «Veere pääl» saatõjuht’
Mu kodokülä Jõksi om
Piusa jõõ kalda pääl Setomaal. Piusa om piirijõgi:
mi lätsimi kuuli Meremäele, a tõõsõltpuult jõkõ
latsõ käve Kapõrahe ja Vahtsõliina. Jõgi pand’ meid
lahku, a vaihõl saimi kokko kah.
Ma
mälehtä, õt mi ja näide ker’kopühä olli esimuudu ja
erälde aol. Olli mi pühä ja tsuhknidõ ehk iistläisi
pühä. Osa eloasjo tetti üteh ja üts’vaihõ ollimi
kõik’ üteh suurõh sovhoosihki. Tõõnõ-tõõsõlpuul jõkõ
eleti rahuh ja ku vaia, avitõdi üts’tõist. Ollimi
siski uma ja võõra.
Veere pääl elämise tunnõ om mul kõik’ aig seeh olnu.
Ma olõ tuust mõtõlnu kõik’ aasta Eesti Raadioh tüüh
ollõh ja telesaadõ «Veere pääl» tull’gi mu mano
vas’t tuuperäst. Ma tahtsõ väiga kaia ello ja
inemiisi siih vahtsõ piiriga poolitõt Setomaal ja
tuud tõisilõ ka näüdädä. Ja nii saimiki kokko –
saatõ režissöör Brambati Piitre ja produtsent’
Laiapea Vahur.
Sjool suvõl sai ma arvo, mille seto omma tõistmuudu
ku iistläse. Setodõl om uma usk, nä hoitva kokko ja
hoitva ummi. Kodoker’ko pühä aigo om kerik ja
surnuaid inemiisi täüs. Istutas esivanõmbidõ havva
man, süvväs ja juvvas. Mälestedäs ja kõnõldas
täämbädse päävä asjo.
Matussidõ man saava kokko kunagi elänü ja parhilla
elävä hinge, tuust sünnüs vägi, miä lätt edesi. Tuu
vägi tuu Setomaalõ jo mujjal sündünü latsi, pand
näid mõtlõma juuri pääle.
Nii
lätt mi saatih uma kodo Saatsõhe Kukumäe Arvo,
Mitkovitsa esä-imä mano tõmbas Tsopatalo Tiina süä.
Taïnah sündünü Kärneri Ülle tund umma vastutust
kultuuri edesi viiä. Tani Diana lindas Ameerikast
uma katõ latsõga kodoküllä Kuksinna, õt siih latsõ
är risti. Raudoja Ahto tege kõrda vanna tallo, tege
nii õt olõsi seto muudu. Ja ku kuulõt Obinitsa
tütärlatsi leelorühmä «Tsibihärbläseq» laulu, kaet
näide käsitüüd, saat arvo, õt aig muut Setomaa
inemiisi kül, a midägi väiga umma jääs alalõ.
Ummamuudu elo om tõõsõlpuul traat’aida. Sinnä omma
jäänü õnnõ vana, inämbjaolt naasõ. Latsi om vähä ja
Petseri kooli aig nakkas ka otsa saama. Tulõ
vindläisi aig. Setodõ-iistläisi muistsidõ
esivanõmbidõ puult algusõ saanu Irboska jääs näide
kätte. Mõla, Taeluva ja tõõsõ ker’ko ja surnuaia
jääse kül Essukõsõ päävä ala, a võõridõ inemiisi
jaost.
Setomaal oldas harinu pall’o ja kõik’ aig tüütämä.
Maa om kehv ja kõik’ aig piät nutitama, kuismuudu ar
ellä. Nii omma ka potiseto ummi asjoga Eestimaalõ
joudnu. Tollõh kauplõmisõh oll’ vajja kannatust,
kavalust ku ka mängu.
Saadõt teteh saimi kokko potisetovooriga, koh olli
noorõ mehe Tartost. Nä tõi vana as’a vahtsõhe aigo
üle ja illo oll’ mõlõmbal puul - nii ostjil ku
müüjil. Tuul kokkosaamisõl paistu vällä, kuismuudu
laul, pillimäng ja nal’amõistminõ inemise kokko
köüt. Ka kirmaskit om õnnõ Setomaal peet.
Lepä kirmaskil olli lõõdsamehe, lauli tütärlatsõ,
laulti üteh ja rühmäviisi, pillihelü lasõ-õs
kinkalgi istma jäiä. Setodõ kirmaski omma kimmäl
pääväl ja keski ei panõ kuulutust lehte. Tiidäs, õt
tuul pääväl, sääl küläh. Tuldas ja ilotõdas. Lepäl
oll’ nätä, ku pall’o sünnüs latsi sisse uma rahva
vaimu, keski es aja näid tands’ma vai laulma, tuu
tahtminõ tull’ näide seest.
Hää
oll’ kõnõlda vanõmbidõ inemiisiga, kiä tiidvä elo
saladuisi. Õt inemine sünnüs, eläs uma elo ar ja sis
lätt minemä. Lätt är siist ilmast, a jääs elävide
lähkohe. Tuud kimmäst tiidmist omma täüs Truba naisi
Olga ja Anni silmä, tuud tiid nunn Olga ja Petseri
Varvara ker’ko papp’ esä Jevgeni. Sääntsiidõ
inemiisiga kokkosaaminõ and’ mullõ hingerahu ja
tiidmise, kiä ma esi olõ. Õt mul om uma rahvas, õt
ma es’ki olõ uma.
Sprengi Ale: olõ-i määnestki tahtmist är liina
minnä!
Võro maakunna Aasta
Inemises valit Krabi Põhikooli direktri Sprengi Ale
(37) manu tasus tõisil op’ma minnä, kuis saa väikut
maakuuli alalõ hoita. Timä luud opilaisikodo tõi
kuuli manu 30 last ja riigi rahha viil päälekauba.
Kas om rassõ juhti
väikut piiriviirset kuuli?
Väega rassõ. Om teedä,
et riik’ jaga rahha latsi päie perrä ja häste eläse
kooli, kon om 130-140 opilast. Meil om latsi 75, a
õnnõs om meil vahtsõnõ maja ja ei piä murõhtama, kas
katus juusk läbi.
Misasi taa
opilaisikodo om?
Sääne opilaisikodu om
Eestin edimäne. Võtami siiä joba kolmandat aastat
latsi, kiä omma muidu tubli, a saa-i koolin kävvü
tuuperäst, et olõ-i kodu tukõ takan.
Mi mõtõ oll’ latsi avita
ja mul om hää miil’, et asi om kõrda lännü ja
muialgi naatas säändsit kuulõ tegemä. Ku inne teimi
kõkkõ hindä tubli kollektiivi jovvuga, sis nüüd om
säädüse tugi takan ja riik’ mass kotussõmassu
toetust. Tõsõ käävä mi manu op’ma, ilda-aigu käve
kaeman näütüses Laheda vald.
Ku kavvas latsõ ti
manu tulõva?
Siin tohes olla
edimäsest septembrist suvõvaihõaoni vällä, a lats’
saa koton kävvü, ku õnnõ taht. Taha-i, et kodu näile
võõras jäässi. A iks kaemi, et nä kõrraligult oppi
ja huviringen kävvü saassi.
Kost latsõ omma?
Jõgõvalt, Tartust, a
päämäne osa iks Võromaalt. Paiklikkõ külälatsiga
saava nä häste läbi. Õnnõ opilaisikotun elämisega är
harinõminõ võtt veidükese aigu. Tuu om loomulik, et
mõnõ päävä peräst taht lats’ kodu. A nä esi omma
ütelnü, et näide jaos om tuu väega olulinõ, et siin
näist hoolitas.
Kost tull’ mõtõ sääne
opilaisikodo tetä?
Kunagi oll’ sääntsiid
latsi hulga Loosi koolin. Ku tuu kuul’ kinni panti,
naksi uur’ma, ku pall’o om latsi, kinkal olõssi
säänest kuuli vaia. Võromaal oll’ näid umbõs 70.
Kõiki sääntsiid latsi
olõ-i muiduki vaia kotost vällä aia, mõnõlõ avitas
tuust, ku sotsiaaltüütäjä saa toes olla.
Mu hindä jaos oll’
uudisõs, et egäl aastal ei käü Eestin koolin 4000
last.
Midä latsivanõmba
as’ast arvasõ?
Vanõmbilõ sai pall’o
seletedüs, et naa latsõ olõ-i kuigimuudu
tõistsugudsõ, õnnõ näide op’mis- ja elämistingimüse
omma olnu kehvembä.
Olõ-i halva arvamist ei
latsi ei vanõmbidõ puult.
Kuis teil paiklikkõ
latsiga om?
Pilt’ om nukra. Egäl
aastal tulõ kuuli neli-viis’ last, a mitte inämb. A
tuu hädäga mõista-i ma mitte midägi tetä. Mul hindäl
om kolm last ja avitas! (Naard).
Miä võinu nuuri
siiäkanti tõmmada?
Ku om tüüd, sis om siin
väega hää ellä. Latsil om vapa ruumi pall’u ja halvu
ahvatluisi veidü. Liinan om maru lihtsä minnä kangi
ala ja midägi halva tetä, a siin om kõik’ ku peo
pääl. Lats’ ei saa minnä ka poodist suitsu ostma:
kõik’ tiidvä tedä. A tüü peräst läävä vanõmba iks
liina.
Hindäl olõ-i olnu
suuvi är liina minnä?
Olõ-i kunagi säänest
suuvi olnu. Nikagu siin tüüd om, taha kimmähe maal
olla. Või-olla nakasõ noorõ kunagi siiä elämä
tulõma, ku saava umma tüüd Interneti tiil tetä.
Küsse Harju Ülle
Sprengi Ale om olnu
Urvastõ algkooli oppaja-juhataja ja Lusti
algkooli oppaja-juhataja. Septembrist 1993 nika
ku märdsini 1999 oll’ Varstu keskkoolin
kustiaoluu ja eesti keele oppaja. 1999. aastal
oll’ konkurss’ Krabi kooli direktri kotussõ
pääle ja Ale võit’ tuu är.
Veebruarin 2000
alost’ Võromaal projektiga «Sotsiaalprobleemse
pere laps tavakoolis», minkast om vällä kasunu
üleriigiline opilaisikododõ tegemine. Kuulus
Võromaa koolijuhtõ ühendüste ja Varstu
vallavolikokku.
Sprengi Ale om
tüükas inemine ja pruuv’ kõik’ as’a kõrraga är
lahenda. Tä om kõvastõ hinnäst tävvendänü, läbi
tennü üle 15 egäsugumadsõ koolitusõ.
2003. aasta
algusõn sai tiitli Võromaa Aasta Inemine 2002.
Om abielun.
Perren kasusõ poig (16) ja kats’ tütärd (12 ja
7). |
Ka
vaenõ või pääd pistü hoita
Oro Astrid,
Kagu-Eesti
Partnõrlusõ programmi Võromaa päälik
Vaenõ olla om halv ja
häpe. Vaesõlõ tunnus, et kõik’ timä ümbre eläse
parõbahe. Pildikast’, (vaesõ inemise kõgõ suurõp
varandus vai mälestüsasi innidsest elost), kand
ütesuunalidsõh toroh õkva tarrõ läük’pilti, minkal
vaesõ eloga peris veid’o ütist om.
Vaesõst inemisõst hoiõtas eräle, kaemalda tuust, et
targa tohtriraamadu sääntse nimega nakkustõpõ ei
tunnista. Tuu om es’ki andis antav, inemine om jo
kar’aelläi, nõrgõba ja viletsäbä tougatas kõrvalõ,
hindä seest vällä.
Vaenõ pruum’ tetä näko, et tä ei olõ vaenõ. A sjoo
om järjest rasõhõp. Vaenõ hoit ummi kuludõ päält
kokko. Kõgõ päält lää-i tä hambatohtri mano, sis
lasõ-i inämp lehti kodo tuvva. Kaes üle uma
söögilavva, ku vajja, sis paastus. Seo om üts’ näist
as’ost, miä lätt tõõsõ poolõ – rikkidõ ilmaga –
kokko. Viimädses ütles vaenõ ar eelektrist ja sis
latsi kool’tamisõst. Vai tõistpite järekõrrah, kuis
kiäki.
Vaesus või tulla õgaüte mano. Ei pästä siih korgõp
haridus, nuurus, hüä tervüs vai niisamatõ rõõmsa
miil’. Vaesusõ vasta avitas mõnikõrd asjo kokko
korjaminõ. Korjat as’a kokko ja pakõt ar. Vaesusõ
iist muidoki. Edimält liina – ku höste lätt, sis
Tal’nahe. A kindlap om kohegi kavvõbahe. Välämaal om
ka vaesust, a tuu om tõistsugumanõ. Pääasi, et ku tä
sinno kotost kavvõndõh ka kätte piasi saama, sis
tõõsõ tuud nii lihtsähe tiidä ei saa.
Kolmadat aastakka om käümäh Kagu-Eesti Partnõrlusõ
Programm’, mink iihmärk’ om vähändä vaesust ja
artoukamist, õkva maapaigoh. Sjoo ao joosul om 60
inemist Võro, Põlva ja Valga maakunnast saanu
kogokunna vedonikõ koolitust. Kogokonna vedonigu
piäsi olõma uma kogokunna hinge, inemise, kedä
usaldõdas kullõma murrit ja vidämä külä ütitsit
tegemisi.
Programm’ ei paku vedonigõlõ ütsindä koolitust. Om
tettü eräle rahapung, kost saat projektiga rahha
küüssü uma külä ja tegemiisi jaost.
Vahtsõaastakuu lõpul saiva vedonigu Rõugõ lähkül
kokko ja peivä voorumit. Kõnõldi tettüst ja
plaanõst, a ka hätist. Nuuri ja latsilda külä,
viinaputõl’, innitsidõ majandidõ suuri majjo
elänigu, kiä omma jo väega pall’o ar harinu tuuga,
et abiraha tulõva. Latsõ, kiä olõ-i umah eloh nännü
tuud, et imä vai esä tüühhü läävä. Miä annasi näile
inemiisile usko? Kuimuudu mõista tähele panda, löüdä
tiirada tuuni, kiä api vajas? Anda tälle julgust
hoita pää pistü ja tunda elost rõõmu, esiki, ku olõt
vaenõ.
Imehti tuu üle, et voorumil kõnõldi väiga veid’o
poliitikast. Paistu, et olti arvu saanu, et tuul
olõ-i määnestki mõtõht. Pühhikaardist, minkõl pääl
hinnäst jõuluvanas tennü poliitik, kõttu täüs ei
saa. A vorstiraasast, minkõ jahimehest naabrimiis’
salahuisi tüüldä pereesä lavva pääle jätt – tuust
külh. Eesti küläkogokunna tulõvik om tuuh, ku
mõistõtas kokko hoita, arvati. Tuu om jo väega
lihtsä asi, a kas jo ülearvo pall’o olõ-i jo valinu
pakkuminegi tiid?
Umõhtagi tabasi minno sjooh kargõh talvõpääväh,
pääle katõpääväst kuuholõkit määnegi artundminõ – ku
veid’o om näil lihtsil Eesti inemiisil välist, ku
pall’o, nii pall’o seeh olõvat tsärinät. |