Seo keväjä või ütelüsest «Uma ja hää!» saia Võromaa kõgõ
kuumõmb reklaamilausõ. Seoniaoni müüdi taa ütelüse abiga
inemiisile pall’alt vorsti, a suurõmbat ossa meile pakutavast
kaubast pidi müümä vahtsõtmuudu, tõistmuudu ja läänemuudu.
Nüüd nakkas vas’t asi paranõma. Võro keriguplatsi pääl naadas
pidämä vanaaolist vurhvi laata, Võromaa käsitüütegijä tahtva
tetä ja müvvä õnnõ umakandi rahvarõivit, turismirahvas ots’
võimaluisi, kuis suidsusanna ja piimäpukki rahvalõ vällä pakku.
Põlva jälleki pruuv’ Folkfesti abiga viiä rahvamuus’ka nuuri
inemiisi sekkä, kedä varbasirutustandsu mano mängit
umtsa-umtsa määnestki muudu ei tõmba.
Häid päälenakkamiisi tulõ rita müüdä Setomaalt, Räpinält,
Kanepist, Karulast ja muialt. Inemise nakkasõ arvo saama, et
rahvakultuur’ olõ-i õnnõ tuu, midä tetäs rahvamaja sainu
vaihhõl. Rahvakultuuri hundament’ om rahva elo esi. Õnnõ sõs,
ku sünnüpääväl leelo üles võedas, om seto laul viil elläv.
Õnnõ sõs, ku korvimeistre umatett korviga kartolt võtt, mõist
tä egä korvi tetä kõvõmba, ku om Hiinast tuud plast’mass’pang’.
Ja muidogi piät egä õigõ vorstitempjä mäletämä, määne oll’
kodosannan suidsutõt tsialiha maik. Kõik’ nuu ja viil
lugõmalda muu mõistmisõ omma kokko rahvakultuur’, parõmb osa
rahva tävvelidsest elolaadist.
Inemise, Võromaa niinimetedüt brändi
olõ-i vaia inämb Talliina reklaamikontoriist otsi, vaia om
tuud pruuk’ma naada, miä om uma ja hää!
UMA LEHE
SÕBÕR!!
 |
Harju Ülle: Võrol tulõ vana-ao laat
Luiga Selle: ku
olt midägi alostanu, är jätku tuud poolõlõ!
Saarõ Evar: Sannaliha pand suu
vett juuskma
Ruitlasõ Olavi:
Monica, ooda, mi tulõ!
ILM
Halla võiva
kurja tetä
Bergmanni Karl,
ilmavana
Lehekuu edimädse päävä piässi olõma veidü
lämmä. Või olla üükülmi. Mõnõl puul või sata lörtsi.
Nigulipäävä ümbre või tulla lämmämb ilm, suuri sadõmiid olõ-i
ette nätä. Edesi nika nigu täüskuuni piässi olõma üükülmi. A
päivä om peris lämmi ja mõnõl puul või vihma tulla.
Kuu viimädsel veerändil omma ilma lämmä, a tulõ ette kaia:
ristipäävä halla võiva mõnõl puul kimbuta.
Tuul’ om õks külm, huul’malda
tuust, kost puult tä puhk. Kuu lõpupoolõ või tulla ka pikset.
|
|
