Ku seo lehenumbrõ kirätükü kokko saiva, pand' meid õkva imehtämä, ku hulga om juttõ nuurist ja nuuriga. Suidsusannu jutust võiti lukõ, et Margna Epp ja Kalve Toomas silmssi külä pääl liikun ja sannu pildisten säänestsamma asja: uutmalda hulga nuuri ja huvitavit inemiisi eläs maal vai om ildaaigu Võromaalõ elämä tulnu.

Säändse tagapõh'a pääl tunnus Elleri Kalle ennustus eesti keele ja rahva kurvast käekäügist Euroliidu all veidükese ülepingutõt. Periselt või elo muiduki nii ka minnä, ku eestläse, noidõ hulgan ka võrokõsõ ja seto, uma maa paprõrahas vaihtasõ ja uma latsõ ärminejis kasvatasõ.

Ildaaigu oll' Vikerraadio kesküüprogrammin saadõ, kon noorõ näütlejä, kiä olli Napolin op'man käünü, kõnõli, kuis Napoli om tõistmuudu, ku üts'ki tõnõ Euruupa suur'liin – ulli massituristi jaos vastik kasimalda kotus, kon võit poodin pettä saia, a naapollaisi jaos hindästmõista kõgõ parõmb kotus maamuna pääl. Üts' näütlejä ütel', et ku eestläisil olõssi nii kimmäs hindäst lukupidämine ku naapollaisil, ei olõs täl määnestki hirmu Euruupa Liitu minegi iin. Kõnõldi, et Napoli olõ-i inämb aastasatu umaette kuningriik', a om sutnu kõik' tõisi kultuurõ mõotusõ vasta võtta ja umahindä Napoli kultuuri osas jauhva.

Et Võromaa rahvas om nakanu umma näko ja esierälist olõmist rohkõmb hoitma, tuud kinnütäse muuhulgan kõgõsugumadsõ küläkokkotulõgi ja kodokandipäävä, midä minevä suvõ joosul külh rohkõmb peeti ku mitma varradsõmba aasta joosul kokko. Pall'o kõnõlas säänegi asi, et Rõugõ kodokandipääväl sai kiränik Kauksi Ülle tutvas uma esäga, kedä tä 40 aastakka – niipall'o täl näid omgi – nännü es olõ.

UMA LEHE
SÕBÕR!!

Silmä Sandri: Vihm võtt lavva päält kardohka ja põllult vilä

Harju Ülle: Suidsusann om Võromaal avvu seen

Laube Kadri: lõõdsamängu võedas maailman väega häste vasta

 

AHOLÄMMI!!!