Võrokiilne laul käänd' ilma pää pääle
Paistus, et tii-laul
käänd' ilma õks pää pääle külh, vähämbält noil, kiä inne
võro kiilt minkaski es piä. Et sääne matsikeelen laul ja
lätt nüüd Eesti iist võitlõma.
Et võro keelen laulõt lugu
rahva meelest kõgõ parõmbas tunnistõdi, om kimmäs märk'
tuust, et Eesti inemise ei olõ umast valla ütelnü, et
umma kultuuri peedäs tähtsämbäs ku muudsat võõrast.
Laulu tegijit tulõ tennädä
– ku minevä aastaga samal aol aiva pall'o latsiaian ja
koolin käüvä latsõ suust vällä inglüsekeelist
velkamtudepaadit, sis timahava laulva nuusama latsõ:
«Esi hinnäst hummogu heräti...» Säändsest laulust saa
latsõvanõmb (ja vanavanõmb) kah arvu, lats' esiki saa
arvu ja ku mõni sõna segädses jääs, saa lats' küssü ja
vanõmb mõist vastada ja latsõl või herädä huvi võro
keele vasta. Ja sis või luuta, et noist latsist kasusõ
inemise, kiä ei pakõ niipiä, ku saava, Võromaalt är, a
käävä ja koolitasõ hinnäst targas ja tulõva siiä kanti
tagasi.
A nuu, kiä uma keele ja
kultuuri hoitmist inne minkaski es piä, piät täämbädsel
pääväl hindä jaos vällä märùmä, kuis edesi ellä.
Targõmba tegevä näo, et omma taast as'ast kõik'aig
pidänü. Om ka viimäne aig – nuu, kiä täämbä
mis-jaos-taad-vaia-om-jorro ajava, tsuklõsõ selgehe
vastavuulu.
Kõgõ taa jutu pääle tulõ
miilde üts' rummal' lugu mineväst keväjäst, ku Võro
liinan kõrraldõdi Võrovis'ooni nimega üritüst, kon oll'
vällä pant eräle avvuhind võrokiilse laulu iist.
Avvuhind oll', a tuu, midä es tulõ, oll' võrokiilne
laul. A puul' aastakka inne tuud oll' Mõnistõ koolin
vahtsidõ võrokeelitside laulõ võistlus, kohe laulõ tull'
16 tükkü! Ja aastak peräst esindäs võrokiilne lugu
Eestit peris Õurovis'oonil.
Tan om, minka üle märki,
nii kõrraldajil ku kultuuri tegijil. Õgal juhul päse-ei
inämb ilosa jutuga, et tahami tetä ja et meile väega
miildüs. Nüüd tulõ õks uman keelen ja ummi asju periselt
kah tegemä naada. |
Harju Ülle:
«Tii» võit härgütäs umma kiilt pruuk’ma
Saarõ Evar: Hädäristjädseq tulõkil
Sae Evald: ku tahat, et
midägi selges saa, piät käe mulladsõs tegemä
ILM
Lummõ tulõ manu
Bergmanni Karl, ilmavana
Küündlekuu tõnõ puul´ jääs
saodsõs. Kuu viimädsel veerändil um uuta külmä
kõvõmbasminekit, mõnõl puul või olla ka nõrku sadõmiid.
Noorõstkuust edesi (28.02) või tulla lämmämbid ilmu.
Piäaigu egäl puul või olla lumõsatu, mõnõl puul või sadu
olla tukõv. Või olla ka tuisku nikani ku kuu lõpuni.
Umma lehte saa osta ja telli
Uma Leht saa osta
Võro maakunnan Lehepunkti müügi-kotussist Võron,
Parksepäl, Vahtsõliinan ja Antslan, Põlva maakunnan
Põlvast, Räpinält, Kanepist, Ahjalt, Sabõrnast,
Võõpsost, Verioralt, Verskast ja Tilsist.
Viil om lehte saia Võro Instituudist,
Karula Rahvuspargist, Seto Talomuusõumist, Räpina
Kodoluu- ja Aiandusmuusõumist, Tarto Pääpost'kontorist,
Lõuna-Eesti keskusõst Tarto ülikoolin, Tal'nast
Rahvusraamadukogo leheletist ja Eesti Keele Instituudi
alt Ateena raamadupoodist.
Lehte saa telli egäst post'kontorist,
e-kiräga (info@umaleht.ee) vai kõlistõn 78 22 221.
|
|