|
Aholämmi
"Rahvajutte
Vastseliina kihelkonnast"
Taad
raamatut lukõn tundsõ edimäst kõrd elun, et mul, Uma Lehe keeletoimõndajal,
om rassõ võru kiilt lukõq. Ja umõtagi ei tulõq tuu tuust, et ma võru
kiilt ei mõistaq. Tulõ vällä, et rahvaluulõkogujaq ommaq yks võru
kiilt väega halvastõ kirja pandaq mõistnu vai ommaq viil 20. aastasaa
algusõn tarvitanuq vanna kiräviisi, no kaegõ esiq, kuimuudu: kerkesand
‘keëkesänd’,
mõtsas ‘mõtsah’, Zäpsi,
peräst väikeist saja pitto ‘saajapito’ ja nii edesi mitmide
lehekülgi kaupa moonutõduq kiilt. Raamatu kokkupandja Salve Kristi
vabandas kül hirmutudõ, et kiilt ei olõq toimõndõt, a tuud olõssi
vaia tetäq olnuq külh. Taa raamatu lugõja piät kül opnu filoloog olõma,
et tuust segädüsest säänest kiilt vällä lukõq, nigu periselt kynõldu
om . Ja ku yks sõnnu kokku lukõq ei mõistaq, sys jääs ka jutu mõtõq
hämäräs. Taa raamat jakkas rahvaluulõkorjajide laiduväärset
traditsiooni rahvajutu kiilt nii kuis juhtus kirja pandaq ja kirjapantu
parandamisest ärq üteldäq. Ja tuud juttu ajava naaq kah, et külämeheq
ja -naasõq kynõlasõki
niimuudu – eesti keelega segi. Segäkiil
tulõ tuust, et uurjaq ei mõistaq esiq võru kiilt vasta kynõlda, a tuud
tunnista jo ei taheta.
Õkvalt
maru hää oll` raamatust lukõq selletüisi teemaplokkõ iin –
asjatundja kirutõt, lihtsan keelen, seletäs olulidsõ ärq. Muiduq
jutuvaliku poolõst ei saaq ka midägi halva üldäq. Võiollaq olõssi võinuq
sisse võtta ka inämb nall`akid juttõ vai mynõ puul`ropugi – tuu jo
umõtagi kah rahva kynõld! Myni jutt ei annaq mu meelest ka jutu myytu vällä,
ommaq ynnõ säändse tiatõq vai ütlämiseq (nt jutuq 31-34, 64, 91).
Kygõ
inämb jäieq mullõ miilde kat`s juttu raamadu keskest: «Sudso lamba tarõh»
(lk 47) ja jutt nr 43 (lk 43), miä kynõlas papakohvist, kiä kaavas`
provvalõ ärq, et kokk toolõ hani asõmal kassist praati tekk`. A vist
es võtaq provva papakohvi tõsidsõlt, selle et tuu es mõistaq õigõlõ
ei võru, läti ega saksa kiilt: «Kakis sei haasenpraat, prouva sei
kakispraat.» Provvalõ ärqkaibamise iist ummõl` kokk papakohvi perse
kinniq ja tsirgukõnõ kuuli niimuudu ärq...
Kuna
papakohv es mõistaq õigõdõ kiilt, es jõvvaq tsirgu jutt provvaniq, täpselt
nii niguq minuniq es jõvvaq pall`uq jutuq nuidõ halva kirjapandmise peräst.
Tahassi ynnõ usku, et muq lõpp ei olõq ärqkynõlamise peräst nii
hirmsa ku papakohvil...
Fastrõ
Mariko
Kagahiiq
kuplit!
Kiä Võrolt Vahtsõliina poolõ sõitvaq, nuuq ommaq Hinsal tiist mitte
kavvõl kimmähe silmänüq maavälidse vällänägemisega puhvit kuplit.
Tuu om sääl saisnu umbõs aasta aigu. Hinsal asuva osaühingu PNK Grupp
saekaadri meistre Vallingu Kaido ütel`, et taa ollõv olnuq syaväe
radarijaama päälmine kupli, miä tuudu kostki Põh`a-Eesti lennuvälä päält.
Kupli võeti ribadõs valla ja panti siin jälq kokko. Ribaq olliq vällä
nännüq niguq banaanikoorõq. Parhillaq sais kuplialonõ tühi; sinnäq
oll` plaanit osaühingu kontorit tetäq, a võiollaq tetäs viil midägi
muud, es oldaq Hinsal kimmäq.
Saarõ
Evar
Saarõ
Evari pilt
|