Om aig, ku välän om maru pümme, tuuperäst läts’ Uma Leht valgust otsma, ja löüdsegi tuud riiulidõ ja kastõ kaupa Proto talost Viira külän Räpinä vallan.
Wiera kündlekotta sisseastja saa edimädse teretüse nõna kaudu. Jah, siist veetäs üle ilma lakja valgust, millel om pääleki hää hõng. Kündlekua pernaanõ Alve Merilin nakas’ kündletegemisega pääle 2013. aasta kündlepäävä (2.02) aigu. «Asi läts’ nii häste viirdümä, et küländ pia tulli ma palgatüü päält är,» kaes tä alostusõ pääle tagasi.
Aigupite om tulnu mano kontaktõ ja teljit. Ütsjago kündlit sünnüs ettevõttõ uma Wiera Nordic Scentsi kaubamärgi all ja tõnõ jago tetäs alltüüvõttu. Kündlit telvä ketipoodi ja asotusõ. Kokko tulõ Wiera vabrikust aastan 10 000 künnelt. Siist mõtsu vaihõlt omma neo jõudnu esiki tõsõlõ poolõ maakerrä – näütüses Ameerigamaalõ, Filipiine pääle –, a kõgõ inämb kaes Merilin siski Saksamaa ja Soomõ poolõ, kon inemiisi ettekujutusõ, määne hõng võissi koton olla, omma eestläisiga küländ üttemuudu.
Eestläsel om hää maitsõ
Kündlit tetäs üle ilma egäl puul. Ku jõuluaigugi poodin ümbre kaia, sis kirivüs võtt peris kangõs: midä siski valli? Wiera Nordic Scentsi kündle ei meelütä värmega. Alve Merilin aja sällä viil inämb sirgu ja ütles, et uma joonõ hoitmisõ man omma päämidse märgosõna inspiratsioon põhjamaisõst, säälhulgan Eesti luudusõst, naturaalsus ja käsitüü. Kõik tuhtisegu temp tä luudusligõst eederligest õlidõst kokko esi. Tuhtist (ek parfüüm) kõnõlõminõ pand timä silmä esieränis helkämä. Seo om põnnõv maailm, mille kodo om teedäki Prantsusmaal. Merilin ütles, et nuhede kokkosegämises om mi maal väega veidü tiidmiisi, tuuperäst om timäst saanu Prantsusmaa tuhti- ja kosmeetigaülikooli opilanõ. Koroonast olõnõs, kuis seo oppus nüüt edesi lätt.
Merilini hindä pruuvmisõ ja kogõmusõ omma vahtsidõ kollektsioonõ seen. Egä aasta tulõ tä millegi vahtsõga vällä. Timahava, ku om tulnu pall’o koton istu, sündü ka kündlekogo Nordic Home (Põh’amaa Kodo). Üte kündle jaos sääl kogon sai Merilin näütüses mõttõ suvitsõl käügil Muhu saarõ pääle, ku väiku külävaihõtii pääl lämmind suvõhõngu sisse hengäs’.
Viil om parhilla ostjidõ siän populaarnõ Väeeläjide kollektsioon: esi saat valli, kas tunnõt hinnäst är sis soen, hirven, kotkan vai üükullin.
Eestläsele miildüse kündletegijä sõnnu perrä mahhe, mõtsadsõ ja lämmä lõhna, noorõmbilõ ka makõ hõngu. Seebilõhnalidsõ kündle jätetäs Eestin ostmalda. «Eestläsel om hää nõna ja hää maitsõ,» tege Merilin mi inemiisi kotsilõ kokkovõttõ.
Ettevõtja elon ka muud hõngu
Ei olõ siski nii, et kündletegemine om õnnõ üts rahulinõ, pääleki häälõhnalinõ tüü. Jõuluaig om kündletegijä jaos muiduki kõgõ kipõmb aig. Sis om Merilinil kündlekuan abin kogoni viis inemist ja tä esi jaga hinnäst pääle vabrigu ja katõ latsõ viil tüütarri kõrraldamisõ jaos.
A aasta läbi tulõ iks mõtõlda ja kaia, kohe kaupa müvvä ja kuis tuu peräle jõud ja kas iks arvõ är mastas. Kõgõ tulõ märki ka vahtsõ pääle. Üts sääne vahtsõnõ asi om näütüses pudõlikõsõn kodolõhnastaja.
Wiera kaupa löüd disaini- ja sisustuspuutõst, lilli- ja aiakaupluisist mitmõlt puult Eestin. Võrokõnõ saa kodokandi tuutja tettüt osta e-poodist ja Coop Põlva puutõst. Tuud perämäst kitt Merilin ku esieränis hääd ja vastatulõjat partnõrit.
Nahk om säitsme aastaga küll paksõmbas kasunu, a küsümüs, kuis edesi, kuis turgu hoita, parõmbas saia ja kassu kasvata, saat nuurt naist siski egä päiv. Kodomoro pääl aidast tettün kündlekuan om hää nokitsa, a kavvõmbalõ kaiõn tulõs tüü iks eräle vabriguhuunõlõ viiä ja tuusjaos näütüses Põlva pääl ümbre kaia. Üts hää mentor kulunu plaanõ säädmise man kah är, tunnistas Merilin.
Ku pall’o kündletuutja esi kündlit palotas? Merilin nakas naardma ja ütles, et timä esi piät otsma tõisi akudõ laatjit ku kündlevalgus. Pruuvmisõs, katsõtamisõs tä kündlit palotas, nii uma vabrigu ummi ku ka tõisi toodangut, a mõttõ omma sis kõik aig tehnilidse poolõ man: kuis taht palas, ku kavva künnel palas, kuis disain paistus jne. Ku Merilin kellelegi kingitüses kündle vii, sis palama panda tä tuud õkva kah ei lupa. Muidu om timä külänkäük mokan: tä niheles ja mõtlõs õnnõ tuust, midä kündle man viil praavita saanu.
Kabuna Kaile
Wiera kündlekua pernaanõ Alve Merilin uman aidan-kündlekuan. Kabuna Kaile pilt
