Sandiaig om läbi, maskiaig lätt edesi
Ma kuuli raadiost, et märdi- ja katrisandi omma uma juuskmisõ är joosnu, a maskõ piät iks edesi kandma. Tuu tähendäs, et iks viil ei tunnõ är noid inemiisi, kiä sullõ vasta kaesõ. Ku telekah om noilõ maskõga inemiisile sakõhe nimi mano kirotõt, sõs uulidsa pääl omma kõik üttemuudu võõra.
Nii ei saaki ma arvo, kuimuudu tahetas inemiisi är tunda, ku valimiisil piät uma näo läbi kaamõra ette näütämä. Vaivalt kaamõra maski perrä helü andja är tund. Tan avitasõ õnnõ kats asja. Ku maskikandminõ jääs pikembäs aos paika, võissi politsei- ja piirivalvõammõt ID-kaartõ asõmõl naada vällä andma inemise näopiltega maskõ. A ku tuu tulõ väega kallis, sõs läämi puuti ja ostami värmilidse vildiga ja kirotami egäüts maski pääle uma nime. Nii olõ-i pelädä, et sõimat sõpra vai teretät vainlast.
