Juumisõvastanõ loeng

 
1985. aasta piimäkuun läts’ käümä viinajuumisõvastalinõ säädüs. Mis juunipüürdest vällä tull’, om esiasi…

Ütte Võromaa rahvamajja kutsuti loengut pidämä kats liinamiist. Üts kõnõl’ luudusõmärke perrä ilmakaemisõst, tõõnõ oll’ lõpõtanu Võrol tehnikumi ja mõistsõ valmis tetä mõnõ tarviligu müüblitükü. Kooliaost olli joonissõ kah alalõ hoitu. Loengidõ iist masti – mis võisõ liinamiihil ülesastmisõ vasta olla. Pääleki olli nä parra elomehe ja külän löüdü kõgõ ilosit tütrikkõ.

Loengidõ kõrraldaminõ käve partei juhtmisõl ja valvja silmä all. Kolhoosi partorg tull’ liinast parteikomitee nõvvupidämiselt, kon nuristi nõrga loengulidsõ tüü peräst alkoholismivastatsõn võitlusõn. Rahvamajan oll’ õkva tulõman liinamiihi loeng. Juhtu nii, et mehe esi saiva loengu teema ärmuutmisõst teedä sis, ku olli rahvamajja jõudnu. Midägi nä viinaviskamisõ halvast mõost kõnõli, a nätä oll’, et sääne jutt ei paku rahvalõ huvvi. Ku suurõmb osa kullõjit oll’ minemä hiilnü, ütel’ luudusõmiis, et kõnõlõs, midä juumisõ asõmõl tetä. Nii sai tä uma loengu iks är pitä. Tõõnõ miis, kes es jõvvaki müüblist kõnõlda, jätse uma joonissõ rahvamajja. Perän oll’ poissõ tüüoppusõ oppaja noid tunnin pruuknu.