Aokirä Eesti Luudus toimõndus om valinu joba 25 aastakka aasta puud. Timahava valiti tuus katai. Eesti kõgõ korgõmb katai kasus Võromaal Pille külän Reinu talo maiõ pääl. Reinu katai om 13 miitret korgõ ja timä ümbremõõt 1,3 miitre korgusõlt om 1,45 miitret.
Reinu talo pernaanõ Orassoni Rael-Adiina mäletäs, et seo puu võeti luuduskaitsõ ala 1966. aastagal. «Nüüd om taa vanas jäänü, ossa murrusõ, ku likõ lumi om. Puu ähvärdäs poolõs minnä ja tormi murdva ossõ. Õnnõs om kõgõ pikemb haru alalõ jäänü,» seletäs Orassoni Rael.
A puu esi talorahvalõ miildüs: «Taa om üts esimuudu puukõnõ, illos kündlekujolinõ. Ega tä meid ei sekä.»
Pildi pääl posiir Orassoni Rael-Adiina puu man kuun poig Elmetiga. Muusiän, mõlõmba Orassoni omma aastit Uma Lehe jutuvõistlusõlõ juttõ saatnu ja noid juttõ om saanu lehest lukõ.
UL
