Ku ma pia nelä aasta iist Uma Lehe päätoimõndajas kandidiirse, oll’ üts lubahus vai plaan sääne, et lehe märgotusõküle päält saa lukõ pikembit ja süvembit märgotuisi eri eloala inemiisilt. Tuuga om lännü nii ja naa; mõnikõrd olõ hää märgotaja löüdnü vai om kiäki esi umma mõtõt paknu, a mõnikõrd om märgotusõkülg lahjõmbas jäänü.
Seost lehenumbrõst pääle lätt käümä Uma Lehe ja Helüaida kuuntüüettevõtminõ, miä tuu lehte lugõmisõs ja helüait.ee kodolehe pääle kullõmisõs vahtsit märgotuisi. Proovimi löüdä põnõvit inemiisi, kinkal om võrokõisilõ üteldä midägi vahtsõt vai esierälist. Märgotuisi sar’a tege valla Hintsi Anna, kiä sai ildaaigu valmis filmi Tarto liina söögipästjist. Anna ei häbendä tuud, et om filmi peräst (ja arvada ka esihindä sisemädsest sunnist) esi kah üts noidõ siäst, kiä prügükastist sinnä visatut kõrralikku söögikraami vällä tooman käü. Luutusõga, et tuu pand söögiraiskamisõ pääle märgotama nii puutõ ku tõisi inemiisi.
Kutsu kõiki lehelugõjit, kel võimalus om, uudistama helüait.ee kodolehte. Põnõvat kullõmist om sääl viil.
Rahmani Jan,
Uma Lehe päätoimõndaja
