Opiq.ee digiopiraamatidõ perrehe om mano tulnu edimäne võrokiilne opiraamat «Luudusoppus noorõmbalõ kooliiäle». Seo om 2011. aastagal ilmunu opimatõrjali «Loodusõpetuse tööraamat 1. klassile, 1. osa» tõlgõ.

Tüüraamatun om 38 päätükkü ja 114 ülesannõt. Latsõ saava tutvas mitmõsugumaidsi keskkundõga (kuul, liin, talo, mõts, aid, turg), opva tundma aastaaigõ, kasvõ, eläjit, tüüriisto ja töid, värme, asjo suurust ja rasõhust, eläjide, kasvõ ja inemise kasumist ja arõnõmist ni viit miilt.

Opitekst ja kõik tüükäsü omma ka võro keelen sisse loedu ja taad om võimalik opmisõ man kullõlda. Kokko om ligi 200 helüfaili, miä avitasõ opilasõl üle kontrolli sõnno õigõ välläütlemise ja kullõlda ilosat võro kiilt.

Opimatõrjaali om võro kiilde ümbre pandnu Kalla Urmas, keeletoimõndaja omma Kalla Urmas ja Jüvä Sullõv, sisutoimõndaja om Nagla Triin, võrokiilse tüükäsü om sisse lugõnu Jüvä Tuulõ, ülesandit omma tävvendänü ja mano tennü Nagla Triin, Lepassoni Marju, Allasõ Tiia ja Kalla Urmas.

Opiq.ee om digiopiraamatidõ keskkund, midä saava pruuki nii kooli ku ka kõik, kinkal huvvi om. Pruukmiskonto saa tetä läbi Stuudiumi ja e-Kooli ni ka e-posti aadrõssiga. Seo om väega hää võimalus latsõvanõmbil opada umilõ latsilõ võro kiilt ja luudusoppust võro keelen ütskõik kon ja kuna ni olõnõmalda tuust, määntsen koolin lats käü. Oppaja üle Eesti saava seo tüüraamadu perrä hõlpsahe tutvusta ütte mii põlist ja paikkundlist kiilt ni tuud, kuis võro kiilt kirotõdas ja kõnõldas.

UL