Ütspäiv ma kuuli raadiost, et Gaute Kivistik om asutanu taandarõngufondi. Varstul olõsi säält fondist kah ütte-tõist saia. Umaosalus om siin kõva, nii et riigi puult olõsi vaia viil villäsaake taandarõngus mõnikümmend tuhat (tagasihoidlik arvõstus) poetada. Euroopa Liidu plaan jo om, et villä tootmist tulõ 20 protsenti vähendä. Kui säält fondist mõnõlõ talumehele kasvai kümmekond tuhandõgõist anda, et las külv naabrimehe põllu pääle tsipa suula (NaCl), sis kiä tuu õks kümnest tuhandõst är ütles. Ja Euroopa jääs kah Varstuga rahulõ.

Tõsõst küllest, kui asja kaia tiidüslikult, sis hiinlasil om sääne igivana tiidüs nigu feng shui. Tuu ütläs, et kui sa kostki vii (shui) ja hõngusõ (chi) müüdä juhit, sis häädüs sääl elu är. Halv hõngus (sitahais ja tossava autu) omma Varstust täämbädses piaaigu kaonu (lastõaian ollõv viil ildaaigu ollu). Kui nüüd Kivistiku fond ola alla pandnu, võinu viikraani kah kinni käändä. Las kaibva vana kaivu vahtsõst vallalõ ja pandva koogu pääle. Mõtõlgõ, määne ilu säält sünnüs!

Ja egas tuu viiga õiendamine niiväega hiinlaisi vällämõtõld ei olõki: joba Kristjan Lible lubasi jõõ taasperilde juuskma panda, et sis jääs villavabrik saisma. Lible, nigu teedä, oll’ lätläne ja Lätist olõmi küländ pall’u lainanu, võtami kasvai runguli (runguls) ja egäsugutsõ muu kasvu, midä keväjält Varstu laadun müüdi, kui viil laatu peeti.

Ja taandarõngu mõtõ om lätläisi siän kah joba ammu levinü. Tulli jo näide tudengi wabariigi aigu Munamäke madalambas kaibma, et sis lätt Baltimaie korõmba mäe avv näile.

Üts asi siski viil om pääle korõmba villäsaagi. Kepikõnd. Õdakildõ seltskond naisi muudkui kühveldäse tokkega tiiviiri müüdä. Tuud asja innembä es olõ ja tuu vasta ei mõista ma kah muud soovita, kui tulõ panda nuu naasõ taasperilde (sälg iin) kõndma. Kivistiku fond võinu näile murõtsõda tsillu piiglikese mütsünoka külge, et sugu iist sällä takka kah nännü. Muidu või õnnõtus tulla.

Pulga Jaan

Lõpp.