Keväjäne aig passis kraammisõs. Tulõman om «Teeme ära!» talgupäiv, midä timahava soovitõdas pitä perretsõõrin ja 2+2 reegli perrä. Lisas omma mitmõl puul vällä hõigatu prügükorjamiskampaania. Üts paik, kon seo kevväi kõva prügükorjaminõ käü, om Antsla vald. Toda tetäs nuuri iistvidämisel ja härgütüsel.
Antsla valla noorõ omma prügüteema esierälidselt üles võtnu. Alostusõ sai tuu paari aasta iist, mõtõ tull’ Antsla valla nuurivolikogolt. «Tuukõrdnõ nuurivolikogu esimiis Männiste Cerda jalut’ Kuldrist kodu ja korjas’ tii veerest prükü üles. Säält sai alostusõ mõtõ esitä SA Archimedes nuuriagõntuuri kaudu Euruupa solidaarsuskorpusõlõ projekt «Antsla vald prügivabaks». Projekt kiteti hääs, saimi toolõ rahha aastas aos,» seletäs Antsla valla nuuritüütäjä Läätse Eerika.
Projektiraha abiga tetti keskkunnateemalinõ konvõrents, kon kõnõldi, kuis veidemb pakõndit pruuki, kuis rohkõmb asju vahtsõst tarvita, midä prügüst tetä saa ja mille ei või prükü maaha visada. Innekõkkõ saiva tuud tarkust noorõ ja koolilatsõ. Viil tetti valmis ja panti Antsla valla teie viirde üles kuus suurt silti, miä tulõtasõ miilde, et Maa ei olõ prügümägi, härgütäse märkmä uma ökoloogilidsõ jalajäle pääle ja kutsva üles asjo vahtsõst tarvitama. Kutsuti üles ka jalotamisõ aigu tiiviiri puhtas kraamma ja tuu üleskutsmisõ pääle reagiirse päält 100 inemise. «Mi vallan saiva minevä keväjä tiiveere peris puhtas,» hindas Läätse Eerika.
Keväjäne «prügükõndminõ»
Kuigi projektiraha sai minevä aastak läbi, naksi inemise ka seo kevväi küsümä, kas jäl tetäs n-ü prügükõndmisõ üleskutsminõ. Tuu tähendäs, et kutsutas üles jalotama ja prügükotti üten võtma, prügü üles korjama, tuud pildistämä ja pilti sotsiaalmeediähe üles laatma. Nii tekk’ Antsla valla nuurivolikogo üleskutsmisõ ka seo aasta. A mille om vaia prügükorjamist kampaania kõrran tetä? «Ju sis inemiisil om tuud vaia. Piät olõma kuulutus ja kimmäle oodõtas tunnustust ka valla puult, et kodaniku omma nii tubli,» löüd Läätse Eerika.
Noilõ, kiä korjasõ üles nii hulga prükü, et umma prügükasti ei mahu vai ei taha sinnä panda, pakutas valla puult prügü ärvidämist. Ja kuigi minevä aastak saiva vallan tiiveere küländ puhtas, jakkus korjamist ka timahava. «Ku kaia pilte, mis omma pantu Mol’ovihu lehe «Antsla vald prügivabaks» kuulutusõ ala, sis prügükogussõ omma iks suurõ,» ütles Läätse Eerika.
Küsümise pääle, mille prükü mõtsa ala viiäs, nuuritüütäjä Läätse Eerika vastada ei mõista. A tollõn, et noorõ omma hulga keskkunnatiidlikumba, om tä kimmäs. «Noorõ ja latsõ omma algataja, kutsva ummi vanõmbit kah üten, et läämi ja korjami prügü üles. Nä omma seo ala pääl rohkõmb koolitust saanu ja ei viska midägi maaha. Nuuri huvitasõ ka kliimateemä ja nä omma tuu alaga rohkõmb kursin.»
Rahmani Jan
Antsla valla nuuritüütäjä Läätse Eerika sildi man, miä kuulutas, et Maa olõ-i prügümägi. Rahmani Jani pilt
