Eesti rahvaluulõ arhiivi timahavadsõ kogomisõ teema omma «Tähtpäävä ja muutuva kombõ koroonakriisi aol» ja «Inemine ja putuka».
Pidokombidõ uurmisõs oodõtas pildi- ja videomatõrjaalõ ni ka kirjeldüisi osavõtjidõ ja kõrvaltkaejidõ, üritüisi kõrraldajidõ ja pidokangõlaisi käest. Tahetas teedä saia, kuimuudu omma inemise pidoliidsi sündmüisi pidänü 21. aastasaal inne koroonaaigu ja kuis tetäs tuud täämbädsel pääväl.
Tõsõ teema all tahetas teedä, midä om Võromaal arvatu hüürläisist, vapsikist, mualaisist, puutäiest ja viil egäsugumaidsist muist putukist.
Oodõtas uskmiisi, ettetähendüisi, tuud, kuis näid om kutsutu, midä näist arvatas, ja inemiisi läbielämiisi, miä omma putukidõga köüdedü.
Matõrjaalõ saatmisõ tähtaig om tulõva aasta alostusõn, a tähelepandmiisi mass korjama naada õkva no, selle et iin omma suvidsõ pido ja putukit om kah suvõaol inämb. Parõmbilõ ütenlüüjile omma avvohinna ja tenoüritüs.
Küsümiisi kava ja ligemb teedüs om internetin aadrõsi folklore.ee/era/kysitlus/ pääl.
UL
