Esimuudu meeleoluga laat oll’ minevä puulpäävä õdagu ja üüse Harglõ vana laadaplatsi pääl pedäjide all. Laada kõrraldajas om Kotusõ kuuntüüvõrgustik – inemise Võru ja Valga maakunnast Taheva, Karula ja Mõnistõ kandist. Laadast oll’ tulnu ossa saama päält 2000 inemise. Laada ettevalmistajit oll’ saa inemise ümbre.

Laat oll’ tõistmuudu joba sisse­käügist pääle. Ei olõ harilik, et küläliisi võtva vasta vallavanõmba: laada üts iistvõtjist, Valga vallavanõmb Rogenbaumi Monika ja Mõnistõ viimäne vallavanõmb Roobi Katrin. Latsi rõõmust’, et piledi asõmõl jaeti reklaampleiätsiid ja joba sissekäügist pääle sai mõtsa alt korjada mustikiid. Egäle poolõ oll’ meeleolu luumisõs üles säet lugõmalda hulgal valgõid lindikeisi, makramee-ilustuisi, tulõkette, heegeldedüid linakõisi, kardiniid, unõnäopüüdjiid, puuossõst aiakõisi, võrkhälle. Pilte päält sai kaia näütüst minevädsest laadast ja tegüsä Harglõ kogukonna tegemiisist. Kotussõ-võrgustigu tegemiisi tugõmisõs olli laadalotõrii ja puiõ külge üles säedü pesäkasti. Midä hämärämbäs läts’ ilm, tuud põnõvambas ja valgõmbas muutu mõtsaalunõ.

Laadal müüdi hulga käsitüüasju ja söögikraami. Latsõ rõõmusti vahvliide ja muffiniide üle, vanaimä leevä-saia ja suidsuliha üle. Mekki sai paiklikõst shiitake-siinist tettüt suppi ja pitsat, osta sai nii Võru- ku ka Valgamaa sõira. Esieränis hulga oll’ värski mii pakjit. Meeleperi süüki oll’ nii liha-, vegan- ku ka makõsõprulõ.

Latsi hulgan olli popi Mõnistõ muusõumi pakudu tüütarõ: kaalaehtide meisterdämine, õhupallõlõ vibuga pihtasaaminõ ja reisile minegi mäng. Tuun viimätsen sai väega hulga nall’a, ku pidi hindäle sälgä ajama suuri rõivit ja juuskma vihmavar’u ja kohvriga tsipakõsõ maad. Viil olli üles säedü tasa­kaalu­ hoitmisõ kabla ja poni­sõbrulõ tetti ponisõitu.

Õdagu lõpõt’ Saatpalu Lauri ja Rebase Peetri kontsõrt. Huvilisõ saiõ kaia Harglõ kerikut ja ossa võtta süäüüsidsest jumalateenistüsest.

Selgüst ja helgüst tunni pia kõik, kiä viisevä tuu õdagu Harglõdõ tulla. Üülaata peeti kolmandat kõrda. Kotussõ kuuntüüvõrgustigu ja laada üts iistvõtjit om Onkli Rasmus.

Fastrõ Mariko

Laadaplats ilostõt mõtsa all paksõ põnõvust mitmõlõ põlvkunnalõ. Fastrõ Mariko pilt