Näoga vai säläga
Ma kuuli raadiost, et õigõ Eesti president piässi olõma kõgõ näoga rahva poolõ. Ma saa arvo, et tuuga tahetas üteldä, et president mõtlõs inemiisiga üttemuudu. No ku ma mõtlõ peris elo pääle, sõs näoga vastamiisi saisva hariligult vainlasõ. Vai vähämbält vastadsõ. Nigu mi vehklejä Tokyoh saisiva umilõ vastatsilõ kimmähe vasta – näoga iks näide poolõ. A sälä takah oll’ näil terve Eesti.
No sõs om õigõmp tahta, et president saisassi rahva poolõ säläga ja astussi timäga ütte jalga ja ütesama tsihi poolõ. A kuis tuu vällä tulõ, ku inemise esi kah ei taha üte tsihi poolõ minnä. Üte tahtva ütte ja tõõsõ tõist. Kuimuudu sõs president saa kõikiga ütte miilt olla? Vast omgi hää, ku vaihõpääl om tä säläga ja sõs jäl näoga. Tuu om iks parõmb ku katõ näoga president.
