Keelüaig
Ma kuuli raadiost, et Türkmenistanimaal kiildse valitsus koroonaviirusõ är. Tuu om kül hää plaan. Mille mi valitsus olõ-i säändse as’a pääle tulnu? Tuu asõmõl keeletäs är suurõ pido.
Meil piässi är kiildmä ka seenehkäümise. Vihmadsõ ilma omma toonu seeneviirusõ. Kõik inemise, kiä veidüki liiku jõudva, omma seenetõvõ külge saanu. Mõtsaalonõ om massinit ja rahvast täüs, a egäleütele jakkus viil siini kah. Ku inämbüs korjas iks kikkasiini vai makõsiini, sõs mõnõ seenelidse omma targõmba ku tõõsõ. Nä kullõ-i naabrimiist ega seenetiidläisi ja korjasõ õnnõ noid kõgõ ilosampi, koh kübärä pääl omma täpi. Mis tuust, et nuu omma kihvtidse.
No ku parhilla piät tiatrihe minneh kruudõlidsõ koodi ette näütämä, sõs mõtsa minneh piässi ette näütämä, et olõt seeneraamatut lugõnu. Muido piät edesi kotoh pallit kardohkit süümä, a seenesoustist pühi suu puhtas.
