Seo aasta peetäs viie ütes Võro vallas saanu kandi rahva vaihõl viievõistlust. Mängitäs muromängõ ja tetäs mälomängu.
Muromängõst om är olnu Vahtsõliinah suusataminõ, Järvereh saapaviskaminõ, Oravil visati villast ja Juba küläh tetti kotijuuskmist. Inne viimäst päivä omma võidu pääle liikmah Vahtsõliina ja Orava kant. Egä paiga kottalõ om olnu ka väiku mälomäng, mille tulõmusõ võetas kokko kuu lõpuh.
A Oravil oll’ minevä riidi kavah ka suur umakiilne mälomäng. Võro keeleh küsümüse olli nii Võromaa aoluu ja kirämiihi ku võro keele kotsilõ. Eräle vuur oll’ Kreutzwaldiga köüdetüisi tähtpäivi kottalõ.
Muu siäh saa seo aasta tävveliku «Kalevipoja» vällätulõkist 160 aastat ja 80 aastat Kreutzwaldi majamuusõumi vallategemisest Võrol.
Mälomängoh lei üteh viis võistkunda, kellest tõõsõ ja kolmanda kotussõ saiva Orava kandi inemise, a võitsõ Võro kandi võistkund Faasi, kiä võtsõ võidu ka talvõl olnul Orava mälomänguturniiril.
Viimäne Võro valla viie kandi võistluspäiv tulõ 14. põimukuul Lasval.
Säinasti Ene
