Tarto ülikooli arheoloogi lõpõti Põlva küle all Rosma liinamäe 800 aastakka vana liinavärehti välläkaibmisõ. No plaanva nä tetä värehtist 3D-pildi ja tuu huviliidsilõ ülikooli kodolehe pääle kaemisõs vällä säädi.

«Väreht om olnu õigõ ahtakõnõ – 1,65 miitret lagja,» selet’ Tarto ülikooli arheoloogiakabineti juhataja Valgu Heiki minevä tõsõpäävä, kaibmisõ peräotsan. «Paistus, et tuu tetti hirmsa kipõga: matõrjaalis omma olnu 10–11 cm läbimõõduga ridva, minka käügi küle omma kindlustõdu. Om ka vähä jämmembit, miä omma sis noid ritvu kinni hoitnu. Kõgõ all om tiikotus, kohe pääle omma sadanu tuki, ku liin palli.»

Rosma liinamäe vall ja väreht ehitedi arvada aastal 1223, ku eestläse säkslaisi ja taanlaisi vasta üles nõssi ja terve Eestimaa (vällä arvat Talliin) kõrras vabas sai.

Valgu Heiki selet’, et läbi liinavärehti olõ-i käümist olnu: löütä-es üttegi maaha pudõnut as’akõist, õnnõ mõnõ suurõ sepänagla, minka väreht oll’ kokko lüüd. «Üttegi ammunoolõ otsakõist kah es lövvä. Tuu tähendäs, et lahingus Rosma liinamäel es lää,» tähend’ Valgu Heiki. «Taa liin om vaivalt valmis saanu ja sis maaha palanu. Kas sis om kõrraga vainlasõlõ ala antu, et umma rahvast hoita, ja jo sis om kokku lepüt, et liin tulõ kah maaha palota.»

Liinavärehti välläkaibmisõ man lövvi arheoloogi üte ummamuudu as’a: tii ala oll’ kaivõt lõks – vainlasõ olõssi värehtist sisse murdõn õkva suurtõ mulku sadanu.

3D-pilt tetäs egäst kaibmisõ kihist nikani ku põh’ani vällä. «Tuu päält saa nätä, kuis kõik tuu värk om maa seest vällä tulnu,» selet’ Valgu Heiki.

Rahmani Jan

Arheoloogi kaibva Valgu Heiki (sais takan) juhtmisõl Rosma liinavärehtit vallalõ.