Paidra külä rahvalõ miildüs iks kuun kävvü. Küläseldsi aasta kõgõ suurõmb tegemine om aastit olnu Eesti perämädse mõtsavele Sabbe Augusti sünnüaastapäävä aigu matk timä mälehtüskivi mano. A pääle tuu saias ka muul aol kokko.

Nii panti timahavvagi matkapääväl paika: vahtsõst tuldas kokko 10. rehekuul, et tähistä nunn’ukonkursiga vanna mihklipäivä vai lõikustenopühhä.

Kuigi koroonapuhang hoit inemiisi rohkõmb koton, sai kümme hingelist seogi kõrd kirja. Tulti iks ummi suuri ja esieräliidsi aiavilju näütämä. Piät ütlemä, et timahava es olõ aiakraami kasvata kerge: alostusõn oll’ väega vihmanõ, nii et kardoka mädäsi virksehe är ja tull’ vahtsõst panda. A sis tulli väega kuuma ilma pääle.

Huulmada tuust saimi kokko parra hulga põnõvid «nunn’usid». Hindajidõ kogo otsust’, et seokõrd saa edimädse kotussõ Orassoni Rael-Adiina kasvatõt putõlkürvits, miä oll’ pia kats miitret pikk. Tõõsõ kotussõ väärilidses peeti Riitsaarõ Laine 11,5 killo kaalvat kabatšokki. Kolmanda kotussõ sai Möldri Kerttu kasvatõt suur ja illos ilohain rebäsehand. Lohutusavvohinna sai viil Kindsiveeri Liia katõ suurõ sarvilidsõ kardohka iist.

Avvohinna nunn’ukonkursist ossavõtjilõ kõrrald’ küläseldsi vidäjä Toomõ Kairi. Lõikustenopühhä pidämä tulnuilõ pakuti ka putro, mille oll’ valmis kiitnü Hausmani Eha.

Timahava om meil plaanin viil kolm tegemist: märdipäiv, katripäiv ja aasta lõpõtaminõ. Näemi sis Paidral!

Riitsaarõ Lainõ

Matkalidsõ Sabbe mälehtüskivi man 20. põimukuul. Riitsaarõ Laine pilt

Nunn’ukonkursi pikä putõlkürvitsä mahtu vaivalt pingi pääle. Orassoni Elmeti pilt