Pulk juuniori artikli (Pulga Joeli märgotus 7, rehekuu Uman Lehen – toim) oll’ nigu üleskutsõ vanulõ legendele hõngu sissepuhkmises. Ma sis panõ üte kirjä, nigu ma tedä kuulnu olõ, nii esä käest ku muialt.

Kats kangõt miist es saa umavahel läbi. Üts oll’ täitevkomitee esimiis, etespite TK, tõnõ tulõtõrjõ päälik, edespite TT. TK oll’ võimu esindäjä, TT tuuiist jutu- ja nall’amiis, rahva lemmik. Tülü algusõn ollõv ollu la femme, ku puhtan prantsusõ keelen vällä üldä. Ilmselt oll’ tegemist katõ kõva kiviga.

TK sai ammõtliku kirjä, kon pakuti tüüd Tallinalõ pikä nimega asutustõ, mia ilmselt puulsalajanõ. Palk väega hää, katõ nädäli peräst nõuti vastust, telefoninummõr oll’ kah.

Tulõtami miilde, kuis tuukõrd helistämine käve: telset numbrõ ja oodit, kuna ühendedäs. Aga oh hädä: nummõr es vasta. Kuna oll’ vihjatu, et asi om puulsalajanõ, sis pidi helistämä kah salaja. TK pidäsi ilustõ saladust, nika ku TT küsse: odot, sul om nüüd Talinalõ korterit kah vaia, mul om üts teedä. Asi selge, TK tulivihanõ. TT punktega iin 3:0.

TK lask’ asjal maha rahunõda ja saat’ sis TT-lõ kirjä: teile om eräldet üts tüühopõn, kaegõ tall ja haina. TT rõõmust segäne: keväjäne haltuura aiamaadõ pääl tõot’ lõbusat ellu. Tull’ süküs, aga hobõst õks es olõ. Peräkõrd TK poet’ moka otsast, et är kuuli. TT sai aru, et hobõst es olõ olluki ja oll’ väega nördinü. Sais viigiline 3:3.

Jutt läts’ muiduki liina pääl lakja ja vahepääl tull’ lumi maha. Üts maamiis tullu hobõsõga liina, raha ollu veidü ja tahtnu saaniteki maha müüä. Määnegi lõuapoolik oll’ soovitanu minnä tulõtõrjõlõ, et sääl ostõtas hobõsõriistu.

Tulõtõrjõ oll’ tõsõ kõrra pääl ja sinnä läts’ küländ äkiline trepp. Säält trepist tull’ miis väega äkiliselt alla. Saanitekk oll’ allatulõkit tsipa pehmendänü. TK-lõ 3 punkti, kuigi poolõldõ tiinmädä, sais 6:3.

Miis lännü kodu kimmä tiidmisega, et Antsla om tuu kotus, kon sünnüse, eläse ja paljunõsõ jõhkra inemise.

TT es saa saisu inne viiki, ku kultuurimaja palamise aigu. Aga tuu om joba tõnõ legend.

Pulga Jaan