Timahavadsõ Betti Alveri kirändüspreemiä sai Võrolt peri luulõtaja AALMANNI ALIIS luulõkogo «Verihaljas» iist. Alveri preemiä om avvuhind, midä andas aasta joosul vällä tulnu tähelepandmist väärt eestikeelidse luulõ- vai proosadebüüdi iist. No vastas küsümüisile värski preemiäsaaja.
Kuimuudu Sust luulõtaja sai ja määndse omma suurõmba saavutusõ luulõilman?
Kuna passis hinnäst naada luulõtajas kutsma? Luulõprõmmu esä Smithi Marc Kelly ütel’ uman Tarton peetün tüütarõn, et ku inemine kirotas luulõtuisi, sis tä om luulõtaja. Ütest külest om kõgõ lihtsämb asja niimuudu kaia, tõsõlt puult es suta ma hinnäst pikkä aigu peris kimmäle luulõtajas pitä. Mõtli, et ku luulõkogo vällä tulõ, sis olõ luulõtaja. A esiki sis jäi väiku kahtlõminõ, kas ma no iks või hinnäst luulõtajas kutsu.
Kõik olõnõs tuust, kuimuudu tähendüse paika panõt. Ku mõtõlda sõna pääle timä kõgõ laemban mõttõn, sis luulõtaja olli joba katsa-aastadsõlt. Kõgõ suurõmb saavutus om õkvalt saad Betti Alveri kirändüspreemiä, a muido iks seo, et mul om uma luulõkogo. Ku no laembalõ mõtõlda, sis mu kõgõ suurõmb saavutus om päähäkääntävüs – et ma ei olõ alla andnu ja kõigist kahtlõmiisist huulmada olõ pruuvnu iks luulõtajana pildi pääle saia.
2020. aasta «Võro-Seto tähtraamatun» kirotit manifest-luulõtusõ «Seo nõid om Võrost». Kuis om täämbädses lännü, kas olõt iks viil luulõilma «nõid Võrost»?
Ma looda, et iks olõ. Ja õkva tuu täpsüstüsega, et luulõilma nõid, mitte harilik nõid. Määndsitki nõia muudu juuni om vaia, et sõnnoga häste läbi saia.
Määne om Su läbisaaminõ võro keelega? Võromaaga?
Mu pere ei olõ kunagi puhast võro kiilt pruuknu. Vanavanaimä kõnõl’ võro-eesti segäkeelen ja tuu, määndse keele poolõ tä inämb kaldu, olõni jutuseldsilisest. Mukka kõnõldõn oll’ eesti keele juuni arvada inämb ku sis, ku tä trehväs’ mõnõ umaiälidsega kõnõlõma.
Ma saa kül võro keelest arvo (mõnõ erändiga) nii kõnnõn ku kirän, a kõnõlda ei mõista ja kiräpilt om viil võõramb. Tuu tähendäs, et hindäl mul om võro keelen kirota rassõ.
Ku mul olnu edevanõmbit, kiä elänü maal, sis vast olnu võro kiil kimmämb.
Määndse teema omma Su jaos ja Su luulõ jaos tähtsä?
Keskkund, täpsempä luudus. Ma proovi luulõn anda võimaligult lühkült, a ütsipulgi edesi luudusõpilte. A ma ei taha hindäle loomingun määndsitki piire tõmmada. Kirota tuust, miä paistus parasjago tähtsä.
Midä Sa viil tiit?
Maali ja tahas tuud esiki rohkõmb tetä. Vahepääl joonista. Päält luulõtuisi kirota ka muid ilokirändüstekste. Ja egä sügüse olõ ma heegeldämisest haarõt. Timahava olõ heegeldänü kats kampsi ja poolõlõ om viil üts vest.
Viil miildüs mullõ jalota.
Küsse Rahmani Jan
Preemiäsaaja Aalmanni Aliis avvohinna kätteandmisõ pidol. Korbi Hanna Linda pilt.
