Suur teno elolõ, kiä om mullõ nii pall’o andnu. Andnu mullõ võimalusõ reisi ja jõuda Mehhikohe, henge kodo. Om rõõm võtta vasta illo. Olla elon…

Nutsuta perämäidsi pääväkiiri hindä sisse, lämmide uulidsakivve kuum üsätüs mu juuri all.

Kerigu hoovin laula Balthasari, paikligu koori dirigendiga «Besame muchot» ja «Cancion del mariachit» – laulõ, midä arvada egä haritumb mehhiklanõ ja eestläne tiid.

Mu heng om tan nii vaba. Selle et mi olõmi üttemuudu, seo paiga hengämine ja olõminõ. Seo paiga luudus ja takt. Olõ nigu koton.

Proovi tan joba päivi esihindäst tulõvit tegemiisi: kullõ umma kihhä, kohe tä taht minnä, ja jala veevä mu sinnä, kohe vaia.

Keriguhoovin om var’olinõ ja sumõrik lämmüs. Koolnu tuvi kihä, miä ma pallõlsi kerigutiinril maaha matta, videles iks viil puu all ja kärbläse omma ilmsüüldä iho ümbre saagi pääl välän. Kellämiis, kiä eelä mul kah kellänüüre lubasi tõmmada, lupa seogi kõrd kaplu otsan tilbõnda. Määne rõõm om üle liina kerigukellä lüvvä!

Kerjäjä poiskõnõ pini ja kärbätünü käega saa umalõ käele tervendüst. Hoia timä kätt ja pallõ Neütsü Guadalupe api. Anna umast kotist är sääl olnu ubina ja muu, minkast taha priis saia. Pallõ Guadalupet, et tä ka minno puhastanu.

Õkva kerikuhe sisse minnen omgi Virgeni kujo, nigu välk selge taiva seest. Ja ma esiki ei imehtä, selle et pallõlsi jo timä käest api.

Gracias a la vida! Suur teno elolõ!

Lumiste Kati
Oaxacan Mehhikon 4. märdikuul 2021

Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.