Taasperilde-Antsla

 
Ma kuuli raadiost, et Pärna Priidu Taasperilde-Antsu luku om aasta otsa tiatrilava pääl mängitü. Parhilla omgi tuu jaos õkva õigõ aig. Egäüts meist tiid vähämbält ütte inemist, kiä tiid Taasperilde-Antsu. Tuu Ants usu ei üttegi tiidläisi juttu, tä meelest om kõik vastapite. Vaidlõs õnnõ vasta ja näütäs näpoga valitsusõ poolõ. A ma olõ õi kuulnu, et Kiiga Tanel vai Oti Anneli olõssi käünü Põlvah vai Võrol sünnüpäivi pidämäh. Viimäst es nätä inne kängäsaamist koskil puul. Ku iks pääliinast üteldäs, et ärke pidäge pidosid, sõs mass näid kullõlda.

Kas api või olla tiidmisest, et kõgõ saa viil hullõmp olla? Ja lättki sitõmbas, nika ku ma esi ringitõmbamist är ei lõpõta.

Ku nüüd viil ilma ka külmäs omma lännü, tükvä kõik kaubakeskustõ lämmähe. Poodist piässi saama õnnõ leibä ja vorsti. Ja las jõulukingitüse tege egäüts esi, piä ei tuud Hiinamaa tränni kokko ostma.

Niigi omma meil koroonaviirusõga jäänü õnnõ sita valigu. Nigu muinasjutuh: ku läät kurra kätt, saat surma, ku läät hääd kätt, piät naasõ võtma. Vai juhtus midägi viil hullõmbat, näütüses jõvvat Taasperilde-Antslahe.