Minevä kuu naksi internetin levimä viis võrokeelist videoklippi, miä näütäse Vanna Võromaad ja kõnõlõsõ võlssarvamiisist. Videoklipi võeti üles seo suvi, noidõ tegijä olli Balti filmi, meediä ja kunstõ instituudi opilasõ, üten lei ka hulga Võromaa rahvast. Klippe režissöör om nuur filmitegijä Juksaarõ Teresa, kiä võitsõ timahava ka PÖFFi lühkeisi filme rahvusligu võistlusprogrammi.

Videoklippe tegemist vidänü Vaaba Janek ütles, et timä naas’ Võro seldsi rahva tegünenüt plaani ello viimä. «Alostusõn oll’ mõtõ tetä klipi, miä kõnõlõsõ võro keele kotsilõ käüvist võlssarvamiisist. Näütüses säändsest, et võro kiil om vannu inemiisi kiil. A mõtõ kasvi kuigi edesi, niimuudu, et tull’ tahtminõ tõisilõ kah näüdädä, määne tuu Võrumaa om. Keväjä naksimi taad värki tegemä. Nigu filmitudõngi ütli – põrgatimi mõttit.»

Tuust põrgatamisõst sündü viis videoklippi. Täämbädses om kõgõ inämb kaetu politseinigu, latsõ ja vana massinaga klippi «Võro kiil – latsi ja kainidõ inemiisi kiil». Klipp «Aigu om!» kõnõlõs võrokõisi tävveste uutmada nuka alt sannapääväst. Filmin «Vana-Võromaa saladus» otsitas mikandi umaperrä ja jõudas lõpus väega lihtsä as’a mano vällä. Klipin «Mõtsa helü» saa kuulda, määnest hellü mõts periselt tege, ja klipin «Mäki vallutaja» loetas üles hulga Vana-Võromaa kõgõ tähtsämbit luudusnättüisi.

Näütlejä löüti päämidselt Võromaalt. «Võrumaa om õks sääne kotus, kon inemise tiidvä tõnõtõist. Mul om kõgõ rohkõmb hää miil tuu politseinigu ja latsõ klipi üle, kon om vanaaolinõ massin. Ma helisti Ojaveere Raivolõ, kas täl tuud massinat om anda. Tä ütel’, et om esi kah nõun tulõma, ja mu meelest tä sai väega häste toimõ. Tä ei olõ näütlejä, a om filmin nii loomulik,» seletäs Vaaba Janek.

Klipi naksi võro keele nädäli aigu Näoraamatun (FB) häste levimä ja täämbädses om kõigil klippel mitukümmend tuhat kaemist. Huvilidsõ löüdvä kõik viis klippi üles Youtube’ist kanali «Võro kiil» päält.

Rahmani Jan

Videoklippe tegemise vidäjä Vaaba Janek. Rahmani Jani pilt