Seo nädäli lõpust om võro keele avaligul pruukmisõl inämb vunki: ammõtilõ saa võro keele iistkõnõlõja. Edimädses võro keele iistkõnõlõjas nakkas võrokõsõst poliitik Oti Anneli, kuu ao peräst andas ammõt üle järgmädsele iistkõnõlõjalõ.
Võro keele iistkõnõlõja om võrokõnõ vai võrokõisi sõbõr, kiä mõist võro kiilt ja taht pitä üte kuu joosul iistkõnõlõja ammõtit. Umal ammõdiaol om iistkõnõlõja iinkujos avaligun võro keele pruukmisõn. Täl omma uma ammõditunnismärgi: ilmatugi (sau), kõnnõtoro (ruupor) ja kaalaraha.
Iistkõnõlõja ammõdi mõtõ sai alostusõ «Vunki mano!» mõttõtalossil 2020. aastagal ja tuud märgoti edesi Võro selts VKKF, Võro instituut ja Võromaa arenduskeskus üten esi huvigruppõga.
Iistkõnõlõja ammõtiga köüdetüin asjun tugõ ammõdi pidäjät Võro instituut: avitas pitä iistkõnõlõja pääväkirotust (blogi) sotsiaalmeediän ja valli vahtsõt iistkõnõlõjat, niisama kõrraldas ammõdi üleandmisõ järgmädsele iistkõnõlõjalõ. Egäüts või instituudilõ soovita vahtsit iistkõnõlõja-kandidaatõ.
Edimädses võro keele iistkõnõlõjas saa seo nädäli lõpust võrokõsõst poliitik Oti Anneli. Iistkõnõlõjas nakkas tä hää meelega. «Kõik säändse as’a, mis andva võro keelele kõlapinda ja toova teema rohkõmb pääväkõrda, omma tarviligu,» löüd tä.
«Seo om hää ja uhkõ mõtõ: kuigimuudu piät jo võro kiilt hoitma. Midä rohkõmb mi esi taad kõnõlõmi ja avalikkusõ iin üles nõstami, tuud rohkõmb om täl ka võimalust. Kõgõ tähtsämb om, et noorõ tulõssi üten ja näil olnu julgust umma kiilt kõnõlda.»
Oti Anneli pidä tähtsäs uma kodopaiga avvu seen pidämist ja noidõ inemiisi tüüd, kiä paigapäälist umakultuuri ja kombit hoitva. «Ku inemiisil om kimmäs identiteeditundminõ ja juurõ süväl, sis nä saava ütskõik kon maailman toimõ. Tuuperäst suur teno noilõ inemiisile, kes tollõ nimel tüüd tegevä. Taa ei olõ sääne tüü, et hummogu läät tüüle ja viies tulõt kodo tagasi. Taa tüü sisse piät uma hinge pandma ja mõtlõma, mis om tuu väärtüs, midä sa edesi annat,» märgotas tä.
Võro kiilt om Oti Anneli mõistnu latsõst pääle. «Mu kodokiil oll’ suurõlt jaolt võro kiil, selle et vanaimä hoitsõ minno. Ja ku mu latsõ sündüvä, palssi ma vanaimäl ka näidega võro kiilt kõnõlda,» seletäs tä umma keelekogõmust.
Rahmani Jan
Edimäne võro keele iistkõnõlõja om võrokõsõst poliitik Oti Anneli. Rahmani Jani pilt
