Nelländä võrokeelitside koorilaulõ ja -säädide konkursi preemiäsaaja omma:

Alo Ritsing – pääpreemiä professionaalsõ koorikultuuri ja Vana-Võromaa rahvalaulu kokkopandmisõ iist: miihikoorilaulu «Hiili, hiili» (Põlva khk), «Jänese jala’» (Rõugõ khk), «Kasva karjaseks» (Hargla khk), «Ää-äh, tsuu-tsuh!» (Rõugõ khk) ja «Olõs mul» (sõna: Jaan Lattik, muusiga: rahvalik); naisikoorilaulu «Imä vei nuku nurmõ pääle» (Urvastõ khk) ja «Kalamehe naanõ» (Urvastõ khk); segäkoorilaulu «Ema ootab koju» (Hargla khk), «Immemaa» (Urvastõ khk), «Kalamehe naine» (Urvastõ khk), «Kolm ubinat» (Hargla khk), «Läämi lehti lepikulõ…» (Karula khk), «Läämi vällä» (Hargla khk), «Miks ei mullu tulnud?» (Kanepi khk), «Märdi’ omma’» (Rõugõ khk), «Uinu, uinu, ullikene» (Räpinä khk), «Vaeselatsõ laul» (Räpinä khk) ja «Vihmakõnõ, vellekene» (Urvastõ khk); latsikoorilaul «Lauliku lapsepõli» (Räpinä khk).

Karin Kuulpak – avvuhind «Kõgõ parõmb latsilaul» laulu «Tuu’ mullõ Munamägi!» (sõna: Contra) viie ja sääde iist.

Alo Ritsing – avvuhind «Kõgõ parõmb miihikoorilaul» laulu «Ei olõ’ rahha» (sõna: Rihhard Iher) viie ja sääde iist.

Karin Kuulpak – avvuhind «Naisikoorilaulu I kotus» laulu «Päävä vägi» (sõna: Triinu Laan) viie ja sääde iist.

Triin Arak – avvuhind «Naisikoorilaulu II kotus» laulu «Naasõ’ ei jätä’!» (sõna: Triinu Laan) viie ja sääde iist.

Rein Kalmus – avvuhind «Segäkoorilaulu I kotus» laulu «Kodutse’ tsirgu’» (sõna: Artur Adson) viie ja sääde iist.

Alo Ritsing – avvuhind «Segäkoorilaulu II kotus» laulu «Väiku sõsar vellega» (sõna: Artur Adson) viie ja sääde iist.

Triin Arak – avvuhind «Segäkoorilaulu III kotus» laulu «Vikahtkaar» (sõna: Triinu Laan) viie ja sääde iist.

Margus Ermast – avvuhind «Segäkoorilaulu III kotus» laulu «Katõkese» (sõna: Rihhard Iher) viie ja sääde iist.

Triinu Laan – avvuhind kolmõ vahtsõ lauluteksti iist: «Naasõ’ ei jätä’!» (muusiga: Triin Arak), «Päävä vägi» (muusiga: Karin Kuulpak) ja «Vikahtkaar» (muusiga: Triin Arak).

Preemiäsaaja kuulutõdi vällä 6. märdikuul kontsõrdil «Liigu, liigu, laulukõnõ!» Põlva kultuurikeskusõn. Seo oll’ ku sümboolnõ teno laululuujilõ: keerolidsõ olokõrra peräst kõlasiva väikul kontsõrdil õnnõ mõnõ preemiä saanu laulõst. Kõik parõmba koorilaulu loodõtas rahva ette tuvva sõs, ku olokõrd om paranu.

Konkurssi kõrraldõdas tuuperäst, et saia tulõvidõ laulupidodõ jaos vahtsõt võrokeelist koorilauluvarra. Küländ hulga varatsõmbi konkurssõ laulõ om jõudnu Umalõ Pidolõ ja arvada saa ka inämb ku ütte seokõrdsõ konkursi laulu kuulda järgmädsel Umal Pidol 2024. aastagal Põlvan. Vahtsist koorilaulõst om plaanin vällä anda ka lauluvihk.

UL

Segäkuur Hilaro preemiä saanuid laulõ ette kandman. Urbasõ Ülle pilt