Võro keele nädäli aigu mängiti jälki «Võrokõsõ välläkutsõ» nimelist mängu. Tuu käve nii, et egä päiv võisõ är tetä üte ülesandõ, miä oppas ja pand inemist inämb võro kiilt tarvitama. Ülesandist annõti ette teedä sotsiaalmeediän, aolehti kaudu ja ka interneti lehekülgi pääl.
Kõgõ tegüsämb arotus ja ülesandidõ tegemisest teedäandminõ käve Mol’oraamadu grupin «Võro kiil». Sääl sai kõgõ populaarsõmbas välläkutsõs poodinimekirä tegemine võro keelen. Tuu sai 308 miildümist ja 59 kommõntaari. Inemise anni teedä, midä nimä umma poodinimekirjä pandva, ja vällä pakuti mitmit huvitavit söögiainidõ nimmi. Võrokeelidse (Ilvese Aapo) laulu otsminõ internetist ja tuuga ütenlaulminõ miildü kah inemiisile. Välläkutsõlõ elli esi üten ka Ilvese Aapo, kiä oll’ timahavanõ päämäne võro keele agent. Sõnaketi mängmise välläkutsõ haardsõ üten hulga mängjit ja võro keele oppaja ni tiidrü Jüvä Sullõv and’ umalt puult üten soovituisi, kuis olõsi tuud mängu parõmb mängi. Võrokeelidse kiräkese kirotaminõ miildü väega mitmõlõ, niisamatõ nigu võro keele eläjänimmi oppaminõgi. Niisama mängu ütentegijile miildü kõgõ inämb eläjänimmi oppamisõ välläkutsõ, a ka nalju üleskirotaminõ, poodin võro keele pruukminõ ja ka nuu ülesandõ, midä sai joba iinpuul nimmatus. Kõgõ inämb mängu mängjit oll’ Võro- ja Harjomaalt.
Mõni võrokõnõ viise ka erälde teedä anda, midä ja kuis tä tekk’. Leedi Heli Mesimummi latsiaiast Põlvast and’ teedä, et näide latsiaia koka olli nädäli söögisedeli pandnu ussõ pääle võro keeli, oppajidõga mängiti sõnaketi mängu ja loeti üles, midä kapin lövvüs, latsiga kaeti multikat «Vanaesä kinnas». Võrokeelitside nal’ajuttõ ja luulõtuisi kirotaminõ om elläv ka päält võro keele nädälit Mol’oraamadu võro keele grupin.
Võrokõsõ välläkutsõ ütentegemise iist saava väiku avvuhinna Kärt-Kristiin Jaagu, Maiki Kruuda, Heili Helmoja, Inge Torop, Heli Leet, Kaja Lattu, Ere Käärmaa, Heli Viks, Karin Luiv, Johanna Hollo, Aarne Kink, Ene Remmelgas, Liis, Silvia Paluveer, Priit Paluveer, Maire Paluveer, Arvo Olesk, Eve Vaigu, Sirje, Ülle Kure, Aime Zirk, Tiia Pinnär, Viiu Kornel, Marianne Lepler, Arne Timm, Ilona Uusmaa, Einar Mikson, Toomõoja Annely, Malle Vissel, Luule Vähesoo, Rosalia Virga, Lea Toom, Aasa Liiv, Karin Laur, Aira Juhanson, Ene Raudkats, Treieri Ellen ja Ojaste Merike. Kõigi avvohinna saajidõga võetas kontakti.
Võrokõsõ välläkutsõ mäng jääs veebilehe https://bingo.visitvoru.ee/et/bingo/vorokoso-vallakutso/8 pääle alalõ ka ildamb, nii et tuud saa mängi ka edespiten.
Võro instituut om väega tenolik kõigilõ inemisile, kiä egä päiv võro kiilt pruukva, a võro keele nädäli aigu viisevä ette võtta viil midägi esierälist.
Fastrõ Mariko
