Seol nimel om parlatsõn Eestin 473 kandjat. Vahtsõlõ kiräviisi pantul põhimõttõlidsõlt sama tähendüsega nimel Alas om 360 kandjat. Priinimmi pandmisõ aigu, ku ainumanõ kiräviis oll’gi vana kiräviis, panti hingelugõmiisi nimekujju Allas 29 mõisan. Kõgõ rohkõmb panti seod nimme Saarõmaal, tervelt 11 mõisan, a Võrumaal kah kuvvõn mõisan. Lihtsämb om üldä, kon seod nimme sukugi es panda: Tartu-, Villändi- ja Pärnumaal. Viimätsest tulõ vällä arvada Kihnu saar, kon Allas panti Ala Tõnissõlõ (Allo Tönnis).
Täämbä eläs nime Allas kandjit kõgõ rohkõmb Võrumaal ja Alas kandjit Saarõmaal. Tuul om uma põhjus. Kõgõ hariligumb sõna seo nime alussõs om (sepä)allas’. Võrumaal üteldäski tuud sõnna topõlt l-iga, põh’aeesti keelealal, säälhulgan Saarõmaal üteldäs alas. Eesti kiräkeelen om pääle jäänü hoobis umasütlejä käänüsse kuju ka nimetävän: alasi. Võrumaal tunti vanast mitmasugumast allast – kängsepäl oll’ uma ja ku hainalidsõ kavvõmbalõ niitmä lätsi, võeti kah vassar ja allas’ vüü pääl üten – oll’ ju vaia vaihõpääl vikatit tsagada.
Tõnõ võimalus om, et nimi tulõ sõna alanõ : aladsõ ’alanpuul olõja’ ütest võimalikust kujust alas. Soomõ vastav perekunnanimi om Alanen. Tartumaal ja mitmal puul muial Eestin om üteld, et tii lätt alasmäge vai alasmäe. Kihnun ja Haanin pantu nime Allas omma kimmä näüte, et sääl man om mõtõld alanpuul olõjat-eläjät.
Kolmas, väega väikene võimalus olõssi, et nimi tulõ sõna hall’as tartu ja mulgi muudu kujust all’as, a nigu jo üteld, Tartu- ja Mulgimaal seod nimme es panda.
Võrumaal panti Allas joba 1809. aastagal Kanepi Karstmõisa Raudsepä Hansu perrele. Sepä ammõti perrä pandmisi oll’ tõisigi, kimmäle näütüses Harjumaal Ruilan, Läänemaal Lihula kerigumõisan, Virumaal Udriku mõisan.
Haani mõisan Suhkamõtsa külän pand’ Rõugõ opõtaja edimält priinime Ala (Alla), a 1826. aasta hingelugõmisõn om tuu muutunu kujulõ Allas. Viitinä mõisa Kogrõ külän panti algusõst pääle Allas, vast sõs iks sepäalasi perrä. Viil panti seod nimme Vahtsõliina mõisa Käpä külän, Vana-Antsla mõisan Säre kandi Hangu talun ja Karula kihlkunna Kaagjärve mõisa Kiiviti talun.
Võrumaa suurõmba Allassõ suguvõsa ommaki peri Viitinäst ja Vanast Antslast. A Võro liinapää Allassõ Anti om nime saanu Haani mõisa suguvõsast.
Saarõ Evar
Rubriigin kõnõldas perekunnanimmi periolõmisõst ja tähendüsest.
