Vanastõ hoitsõva inemise rohkõmb kokko. Mitu põlvkunda elli üte katussõ all, inämb käüti ka ütstõõsõl külän. Internetti vanastõ kõik aig es vahita, selle et tuud es olõki.
Eesti rahvas hoitsõ perämäne kõrd esieränis kõvastõ kokko laulva revolutsiooni aigu. Balti ketin saisti käest kinni hoitõn, tuu andsõ saisjilõ esieränis kõva kokkohoitmisõ tundõ.
Edesi naati kõrrast iks veidemb kokko hoitma. Egäüts tormas’ ummi tegemiisi mano. Tulli vahtsõ võimalusõ ja inämb es piä nii pall’o kokko hoitma. Elo läts’ parõmbas, a kokkohoitmist jäi veidembäs.
Mullõ paistus, et no om jälleki käen aig tsipa inämb kokko hoita. Elo sund täämbä elektrit kokko hoitma, a võiolla om üten tuuga hää alosta ka kokkohoitmist laembalõ. Vai vähembält tuu pääle tsipakõsõ märki.
Rahmani Jan,
Uma Lehe päätoimõndaja
