Inemiisil omma iks uma lemmiktegemise. Ku talv tulõ, otsva pall’o tarõ päält suusa vällä. Keväjä jälleki tuvvas tsikli vai jalgratas kuuri alt moro pääle. Suvõl pandas grill tossama ja sügüse kaias, kas seenekorvi sang iks viil korvi kand.
Talvõ tõsõn poolõn om ka mul üts lemmiktegemine. Otsi vällä uma kolm kirvõst (nigu muinasjutun) ja nakka puid lahkma. Edimält andva sälä pääl säändse lihassõ tunda, mink olõmanolõmist nigu es tiiäki. A nigu päiv lätt kõrrast pikembäs, lätt pikembäs ka puulahkmisõ aig. Haluunik kasus ja pakuunik jääs veidembäs. Tulõ naada märkmä, kuis ja kohe riitu säädi.
Lõpus om kevväi jo käega kumpi. Päiv paistus, raadio mäng ja tsirgu laulva egä päiv iks kõvõmbalõ. Sääne om mu trenn ja teraapia talvõ tõsõn poolõn.
Rahmani Jan,
Uma Lehe päätoimõndaja
