Tarto liin üten Lõunõ-Eestiga om 2024. aastagal Euruupa kultuuripääliin. Kultuuripääliina kavan om ettevõtminõ, miä kuts Lõunõ-Eesti kogokundõ üles ummi tegemiisiga üten lüümä. Midä täpsempä plaanitas? Küsümiisile vastas Tarto maailmaülikooli projektijuht Laanõ Triinu Tarto Ülikooli eetigakeskusõst.
Miä om Tarto maailmaülikuul?
Tarto maailmaülikuul om kogokunna-akadeemiä tüüpi sündmüisi sari Lõunõ-Eestin. Tuu om osa «Euruupa kultuuripääliin Tarto 2024» põhiprogrammist. Maailmaülikoolin saava kokko aktiivsõ kogokunna ja maailma tipptiidläse. Nä saava vaihta kogõmuisi ja otsi välläpäsemiisi üleilmaliidsile hätile paigapäälitselt ja vastapite. Tegemiisi vidä Tarto Ülikooli eetigakeskus.
Kuimuudu täpsempä Vana-Võromaa rahvas saa maailmaülikooli tegemiisin üten lüvvä?
Kõgõ edimält om võimalik uma kogokunnaga kandidiiri toimumiskotussõ pakjas ja kõrraldajas. Parla omgi vällä kuulutõt mõttidõ korjamisõ aig. Mi oodami, et kogokunna üle Lõunõ-Eesti panõssi uman kandin pää kokko, märgotasi ja saadassi meile uma teema üten seletüsega, määne näide piirkunna sündmüs võissi olla. Ku toimumiskotussõ ja teema omma vällä märgidü, nakkami egä kogokunnaga eräle (ja kõigiga kuun) liikma avaligu sündmüse poolõ, kohe saami kutsu uma kandi rahva ja «Tarto 2024» küläliidsi kah.
Maailmaülikooli kõrraldaja pakva üritüisi mano eksperte tiidüsilmast. Mille om hää tegemiisi mano tiidläisi tuvva?
Kõkkõ ilma tiidmisi olõ-i kinkalgi. Tuuperäst om hää, ku mi kesken om inemiisi, kiä mõnt asja põh’alikumbalt tiidvä. Ja esieränis hää om, ku mi päält esihindä tarkusõ tõnõkõrd noid ka kullõmi. Näütüses om mul umbõ tark miis, a ku mul massin katski om, sõs ma lasõ-i täl tuud paranda, a vii massina õks Elari vai Ivo kätte. Niisama kullõ tervüseküsümüisin õks suurõmba tähelepandmisõga tohtrit ku naabrinaist (a timä käest saa hääd nõvvo sotsiaalvaldkunna küsümüisin näütüses). Ütesõnaga, kõkkõ piä-i esi tiidmä vai mõistma, a ull’ om tuu, kiä tõisi kokko kor’adu tarkusõ kullõmalda ja pruukmalda jätt.
Määndse teema võinu olla maailmaülikoolin?
Piire mi väega ei säe: ku kogokund om murrõn hariduselo vai luudusõ peräst, sõs tulõgi tuud arota. Ku hädä omma köüdedü vaimsõ tervüse, kihvtidse söögi vai inemiisi ärkolimisõga säält kandist, sõs kõnõlõmi tuust. Kogokunna andva teema ja mi otsimi tiidläse, kiä noid asju uurnu omma ja inemiisiga kõnõlda mõistva. Nii et kõgõ tähtsämb om vällä märki teema, midä ütsindä kõrda ei saa ja mink man saava tiidüs, ütitside väärtüisi otsminõ ja halvaspidämisest vaba mõttõvaihtus appi tulla.
Olõti ütelnü uman teedüssen, et paigapäälidse hädä kõrdategemine muut kõgõ ka midägi üle ilma. Kost sääne tiidmine?
Vaihtõpääl või paistu külh, et elämi ku kotin, ütski maailma murõ meile ei putu ja ega maailm meist ka midägi ei tiiä ja tahaki ei teedä. Nii tuu sõski ei olõ. Parhilla jõudva kõik ilma ull’usõ väiku vaivaga meile õkvalt kodo ja nutisäädmehe, tarkusõ kokkokorjaminõ või tõnõkõrd ütsjago keerolidsõmb olla. Tuu man mi tahamigi appi tulla ja mul om sõski usku, et hüvvil otsussil ja lahenduisil, praktikil ja tiidmiisil om kah muud üle ilma lakja minnä.
Mis aol nuu tegemise omma ja kuis nä Euruupa kultuuripääliina muu kavaga kokko läävä?
Tarto maailmaülikooli 12 sündmüst 12 esi kotussõn ja teemal võissi toimuda 2024. aastagal. Ku mõni kogokund tsiht joba 2023. aastagat, sõs tuu passis kah häste. Kõik tegemise omma osa «Euruupa kultuuripääliin Tarto 2024» kavast.
Lõunõ-Eesti kogokundõ mõttit ütenlüümises oodami joba seo keväjä alostusõs, kooni 21. urbõkuu pääväni. Ligembät teedüst saa kodolehe eetikakeskus.ut.ee päält.
Küsse Rahmani Jan
Tarto maailmaülikooli projektijuht Laanõ Triinu. Tarto Ülikooli eetigakeskusõ pilt
