Võromaalt Antsla kandist peri luudusõpiltnik MÜÜRSEPÄ TUULE om ummi piltega varrambagi silmä paistnu, a no õnnistu täl jõuda riikevaihõlidsõl maastigupildivõistlusõl 238 parõmba sekkä.
Uma Leht uur Tuule käest, mis võistlus tuu oll’ ja midä tä parhilla tege.
Tegu om riikevaihõlidsõ egä-aastadsõ maastigufotodõ võistlusõga. Hindamiskogu viis liigõt andva egäle pildile 100 punkti skaalan hindit ja tulõmus rehkendedäs noist hindide keskmädsest. Pilditegijide jaos tege as’a erälidses tuu, et meile näüdätäs perän võistlust egä hindaja punktõ, tuu om nigu väiku tagasiside.
Hinnatas peris kriitilidselt: timahavva oll’ 4504 pildi hulgast 101 parõmba hulka saamisõs vaia saia 85,2 punkti. Mu kõgõ parõmbal pildil õnnistu 84,6 punktiga jõuda 238 sekkä.
Mis pilt tuu om?
Mu pildi pääl om üles võetu urbõkuu kõomõts kõva tuulõ käen. Tuul pääväl puhksõ tuul nii kõvva, et tuud oll’ võimalik pildi pääle püüdä.
Tarviti neutraalhahka filtrit, miä lask kaamõra sisse veidemb valgust ja nii saa pildistä pikembä säriaoga. Tulõmis olli pildi pääl liikva kõoladva.
Määne om su meelest hää luuduspilt?
Mu jaos om hää luuduspilt sääne, miä pakk üllätüst. Tuu või olla midägi säänest, et edimädse kaemisõga saaki ei arvu, midä om üles võet vai määnest tehnikat tarvitõt. Vai pand pilt kogoni mõtlõma, kas sääne asi om luudusõn tõtõstõ võimalik. Sääne pilt, miä sund pikembät aigu silmä pääl hoitma.
Ku pall’o sa perämädsel aol pilte tetä jõvvat?
Kaamõra pääle ei olõ viil kõrdagi tolmukõrda tegünü, a iks tahtnu inämb luudustõ jõuda.
Opit Zürichin ilmastigufüüsikat. Midä tuu tähendäs?
Proovi läbi jürrä kor’atuid ja modelleeritüid andmit ilma ja kliima kotsilõ, esi arvu saia, midä üts vai tõõnõ tulõmus tähendäs, ja ku võimalik, sis noid asju ka tõisilõ «tõlki».
Mis sust sis edesi saa, ku olõt opmisõ lõpõtanu?
Seo as’a opmist olõki-i võimalik lõpõta. Tulõ mugu edesi vastussit otsi.
Ku pall’o jõvvat opmisõ kõrvalt kodokanti?
Nii pall’u ku võimalik. Suvõl kuu-kats ja jõuluaigu iks kah.
Küsse Rahmani Jan
Pilt «Tsipa tuulinõ», miä om üles võetu Karula kihlkunnan Valtina külän. Müürsepä Tuule pilt
