Paistus, et um aig, ku inemise võinu hindä seen löüdä tsipa inämb luutust.
Mullõ trehväs’ kätte Viktor Emil Frankli raamat «…ja siiski tahta elada». Sääl oll’ väega pikält juttu autori elost. Tuust, kuis tä juudina trehvü kuunduslaagrihe, kõigist noist jälehüisist. Ütle ausalõ, lugõsi tuud raamatut jupikaupa. Lugõsi, läts’ hirmsas, pandsõ käest ja mõnõ ao peräst lugõsi edesi. Mõtli vahepääl, et jätä poolõlõ, et mitte hindä sisse säänest suurt kurbust ja vallu tekütä.
A siski edesi lukõn sai arvo, et raamat um hää, kõnõlõs tuust, kuis inemine uma tanilman toimõndamisõ ja tegemiisi man valikit tege. Franklil avit’ ello jäiä tuu, et täl oll’ kõgõ luutus, kuis seo massinavärk lätt müüdä. Tuu luutus avit’ki ja tä pässi säält. Kümne aasta peräst sai täst tunnustõt neuroloogia- ja psühhiaatriaprofesri, kiä opas’ inemiisile, kuis um võimalik luutusõlda olokõrrast vällä tulla ja elämä jäiä.
Tõnõ näüde: kuulsa Ameerika kiränik Helen Keller. Sündüden oll’ Helen terve lats. 19 kuu vannudsõlt jäi tä rassõ haigusõ peräst pümmes ja kurdis ja veitü ao peräst es saa inämb kõnõlda kah. Oppaja Anne Sullivan opas’ tedä tõisi inemiisiga suhtlõma ja tä elli 88aastadsõs. Üten uman kirätükün kirotas Helen, et um elänü fantastilidsõ elo. Tuugi näütäs, et inemiisil um tan ilman kaemalda kõigilõ hätile luutust.
Eesti kliiniline psühholoog Inna Narro um kirja pandnu noidõ inemiisi ütelüisi, kiä umma õkva siist ilmast är minemän. Noin ütelüisin um väega pall’o hääuskmist. Üts näüde: «Ma sündü valgusõn ja lätsi valgustõ.»
Ku mõtõlda täämbäst maailma, sis kats aastakka tagasi, ku taa pandeemiä tull’, es olõ pall’odõl luutust. A nigu iks, inämbüs asju lätt müüdä. Ja tuu reaalsusõga, kon mi täämbä olõmi, tulõ elämä oppi. Ku lukõ maailmast üle käünüist haiguisist ja pandeemijist, sis um iks nii olnu, et tugõvamba jääse ello. Luutusõlda olokõrran um kõgõ luutust, et tulõt tuust vällä.
Egä hummok, mis meile um antu, um luutus, et vahtsõnõ päiv tulõ illos ja pääväpaistõlinõ. Ja meil um võimalus kokko saia ummi ligimäidsi ja inemiisiga, kes umma mi tiile saadõtu. Soovi, et meil olõs egä päiv julgust näile kasvai kõlista ja küssü, kuis näil lätt.
Sis um meil luutust.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
