Hindätiidmise avvohinna 2022

Imäkeelepääväl anti kätte 2022. aastaga Hindätiidmise avvohinna. Avvohinnaga kitt Võro instituut üten Põlva ja Võro umavalitsuisiga Vana-Võromaa latsiaidu, kuulõ, asotuisi-ettevõtjit ja inemiisi, kiä omma tennü uma põlitsõ keele ja meele hoitmisõ hääs süämega tüüd. Seokõrd anti vällä neli avvohinda.

Võro latsiaid Sõleke oll’ üts edimäidsi Vana-Võromaa latsiaidu, kon tetti keelepesärühmä – noidõga alostõdi joba 2011. aastaga sügüsest. Täämbä tüütäs Sõlõkõsõn kats keelepesärühmä, kon ütel pääväl nädälin kõnõldas latsiga võro keelen. Keelepesärühmi oppaja kõnõlõsõ egä päiv võro kiilt nii tüü man ku vabal aol, võtva elävält ossa Võro instituudi kõrraldõduist keelepesä-koolituisist ja opireisest.

Keeleoppusõn löövä üten ka muusigaoppaja. Sõlõkõsõ latsõ omma ossa võtnu kõigist Puiga näütemängopäivist, niisamatõ folklooripäivist ja võrokiilsest laulupidost Uma Pido.

2019. aastagal asutõt Põlva Jakobi kuul oppas võro kiilt ja kultuuri kooli luumisõst pääle. Seol opiaastagal omma tsõõritunni 2., 3. ja 4. klassin.

Orioni Jana. Rahmani Jani pilt

Et kuul om saanu nime Põlva lähkült Himmastõst peri Hurda Jakobilt, sis hoitas avvo seen suurmehe mõttit, paigapäälist kiilt ni kultuuri: tetäs kuuntüüd Hurda-nimelidse Põlva rahvaharidusõ seltsiga, võrokeelitside etteastmiisiga võetas ossa paigapäälitsest folklooripääväst. Koolin käü kuun rahvatandsu- ja koorilaulutsõõr, tetäs ka pilliansamblit. Tähtsäs peetäs esämaalisust, kristlikku eetikat, Lõunõ-Eesti kultuuriperändüse tundmist. Põlva Jakobi kuul om Tarto lutõrliku Peetri kooli haroasotus.

Folklooriansambli Käokiräs toimõndas Põlvan 1987. aastagast. Käokiräs om korgõmba astmõ folkloorirühm, kiä egä nelä aasta takast umma häädüst tõõstas. Käokirä lauljil om tekkünü põlvkundõvaihõlinõ järepidevüs – latsist vanaimmini. Ansambli kuts hindä ettevõtmiisiga üten lauljidõ hindä latsi ja latsõlatsi, niisamatõ tetäs kuuntüüd Põlva Mesimummi ja Pihlapuu latsiaia latsiga. Sakõst kutsutas umilõ esinemiisile mano pillimiihi (lõõts, viiul, kannõl) ja perimüsligõ tandsõ tandsjit.

Käokiräs om esindänü Eestit folklooripitõl üle ilma, näütes Poolan, Šveitsin, Ameerikan, Tahitil, Jakuutian, Udmurtian, Lõuna-Korean, Indoneesian.

Orioni Jana kõrraldas 2019. aasta vahtsõaastakuust võrokiilset kohvitarrõ Tal’nan Kadrioro raamadukogon. Üle katõ nädäli neläpäivilde tege Jana kohvitarõ küläliidsile ettekandõ, olku sõs kohvitarõ vormis silmäst silmä kokkosaaminõ vai puutrõ kaudu läbikäümine.

Võro keele nädälil 2.–7. märdikuul 2021 kõrrald’ Jana keelekohvikun kats viktoriini Võromaa ja võro keele tundmisõ kotsilõ.

Seo aastaga mahlakuu alostusõn peetäväl Tal’na võro seldsi suurkogol plaan Jana näüdädä vahtsit võrokeelitsit raamatit.

Folklooriansambli Käokiräs. Rahmani Jani pilt