Jalgpall om tuu mäng, kon üte mängvä ja ülejäänü ennustasõ tulõmust. Vahtsõmbal aol om küll ennustamine antu eläjiide kätte. Nail mindev parembalõ täppi.
Inemise umakõrda ennustasõ, kas parembalõ pand täppi saarmas vai madu-huss. Vot, ma olõ kah tuu tõist tüüpi ennustaja. Ennusta, kas paremb ilmaennustaja om musta vai valgõt kirjä lammas.
Katõ pääle kokku võit lambiide päält aga ennusta, kas timahava tulõ Ragnarök vai om timmä jäl edesi tougatu. Ah jah, Ragnarök om sääne ilmalõpp, kon veli ei tunnõ velle, inemine ei tiiä, kas tä om miis vai naanõ, eestläne ei tiiä, kas tä kodu om Eesti vai Soomõ, pernaanõ ei tiiä, kas poodin suula om vai ei olõ, poliitik ei tiiä, kas tä om verrev vai valgõ, tiidläne ei tiiä, kas Darwin võlsse nimme vai kogõmalda jne.
Ku lambiide manu tagasi tulla, sis statistika perrä om asi nii, et ütetõisku elun tallõkõsõ kotsilõ tulõ katõsatõist surnut. Äräsellätedült: 38 protsenti tallõkõisi jäi ellu, 62 protsenti kuuli kõrraga är. Järelikult tulõ Ragnarök 62protsendidsõ tõõnäosusõga. Paekõ no, kiä vähägi saa!
Üts vana jutt oll’ sääne, et jänessel naanu mõtsan ikäv ja tä pistnü juuskma. Et juusk igävüse iist är vai nii. Karu tullu vasta ja õkva norima nigu vinneaignõ miilits: misperäst joosõt? Jänes sis võlssnu, et mõtsan om kiudutamine, et kõik, kel mitu ülikunda, saadõtas Tsiberile. Karu pandnu kah juuskma ja õigõ pea juusknu terve mõts.
A ahvil ollu astma ja täl tõmmanu hõngu kinni. Jäänü saisma ja äkki tullu pähä mõtõ: kohepoolõ ma piat juuskma, kas ida vai lääne poolõ? Ja ahvist arõnõsi eestläne.
Jutt om üles kirutõt Kuusalu kihelkonnast ja om kõigildõ koonkõlan Darwini teooriaga. Ja eestläsest arõnõsi tõsõ rahva, aga Darwin tuud es tiiä.
Protsent protsendis, a ma panõ õks keväjä kardula maha.
Pulga Jaan
