Kreutzwaldi memoriaalmuusõumi vahtsõn välläpanõginukakõsõn saa nätä dokumente, käsikirju ja pilte, miä tutvustasõ eesti rahvuseeposõ ukraina kiilde pandjat Räppo Anfissat. «Kalõvipoig» ilmu ukraina keelen 1981. aastagal Kiievin, nii et tõlkja, kiä kuuli 1973. aastagal, umma tüüd raamadu kujol es näeki.
Huvi eesti keele vasta ja mõttõ panda eesti rahvuseepos ukraina kiilde sai Lõunõ-Ukrainast peri Anfissa uma mehe Räppo Jaani käest. Võromaalt peri Räppo Jaan oll’ Ukrainan tunnõt ütiskunna-, haridus- ja kultuuritegeläne. Abielopaarilõ avvus om Räpo külän ka mälehtüskivi.
Räppo Jaani 1920. aastil alostõdu koolivahtsõndusõ perändüs om Ukrainan täämbädseni avvu seen. Tä oll’ ka Ukraina NSV haridusministri asõtäütjä. Harkivi pedagoogikaülikooli saina pääle säeti 2009. aastagal Räppo Jaanilõ mälehtüstahvli.
UL
Räppo mälehtüstahvli Harkivin.
