Nimekujul Tsupsman om 38 kandjat, Zupsmann – 28. Lisas omma viil Zupsman (21) ja Tsupsmann (6). Muiduki om taa kõik üts ja sama Räpinä priinimi algkujuga Zupsmann. Tunnus, et ts-algusõga kirotamist om rohkõmb suguvõsa Vinnemaalõ vällä rännänün ja tagasi tulnun harun, näide jaos oll’ tuu kiräpildi vahetus sama välläütlemisega: z- > ц- > ts-. Eestin om jäädü tartu keele z-i [tseti] manu, võlss olnugi taad nimme vällä üteldä [zee]-ga.
Seo nimi panti õnnõ üten talun, Ruusa mõisa Võukülän, Tsupsa Paabu Jaagu perrele. Räpinän üteldäs vanna küläkiilset nimme vällä kattõ muudu: Tsupsa ja Tsüpsä. Sammamuudu või paiga pääl üteldä ka priinimme: Tsüpsmann. Tõsõ Tsüpsä Räpinä kihlkunnan saiva nimes tõisi tulõtiisi. Näütüses Räpinä mõisa Zupsing, seoilmaaigu muutunu kujulõ Zupping (53). Sõs viil Jaama küläst peri Zupson (15), Toostõ kuulmeistre priinimi Zupsberg (seoilmaaigu Zubsberg (7)) ja är kaonu nimi Zupsar.
Tsupsa vai Tsüpsä lisanimi Räpinäl om olõman olnu piaaigu sada aastakka inne tuud, ku opõtaja Heller priinimmi vällä märkmä nakas’, 1738 Hemelesse Supsa Peter Nulga külän ja Subsa Mick Jaama külän. Kuigi nimme kirutõdi s-iga, võidi nii edesi anda iks ts-algusõga nimme.
Ega taa nime peritolu selge olõ-i. Valga lähkün om Supa külä ja Kõpu kihlkunnan Supsi külä. Supsi ütes võimalikus alussõs om pakut vanasaksa edenimme Subbert vai sõs saksa keele sõnna Schubbejack ’kelm, petüs, kaabak’.
Räpinä Tsupsalõ välläütlemise poolõst hoobis lähkümb om sõski vinne hõigunimi tšupša (чупша). Tuud peedäs vinne perekunnanimmi Tšupšev (Чупшeв) ja Tšupšin (Чупшин) alussõs. Või-olla om ta saad sõnast чупa, minkal om tähendüs ’rokk, munapudõr’, a niisamatõ ka ’lõhvõrdaja, porgataja’. Nimele om pakut ka kar’ala keele peritollu.
Tähele tasus panda ka läti sõnna čups ’unik’, minka naissuust vastus čupa tähendäs muuhulgan hiusõtuttu. Tuuga om hää kõrvuisi säädi vinne ja ukraina sõnna tšub (чуб), miä tähendäs kah hiusõtuttu, säänest nigu tüüpilidselt Zaporoožje kasakil oll’. Hulga võimaluisi, minkast vinne tšupša om võinu tulla.
Eestistämisel om nimme Zupsmann vahtsidõ nimmi vasta vahetet 19 kõrda. Rohkõmb Räpinä kandin võetu nime omma näütüses Arumäe, Jaanimägi, Lehtla, Raudva ja Valdur.
Saarõ Evar
Rubriigin kõnõldas perekunnanimmi periolõmisõst ja tähendüsest.
