Võrokeelist latsi ilolugõmist kuuld timahavva Sännä mõisan 12. lehekuu pääväl (12.05) algusõga kell 12. Võistlusõlõ om aigu kirja panda 9. lehekuu pääväni. Latsi lugõmist omma oodõdu kaema ja kullõma kõik huvilidsõ.
Adsoni Arturi luulõlugõmisvõistlusõlõ oodõtas latsi tsill’okõisist nikagu gümnasisteni. Lugõjit hinnatas nelän vannusõrühmän: latsiaid – I klass, II–IV klass, V–IX klass, X–XII klass.
Egä kooli vai latsiaia lugõja kand ette üte pala – Adsoni Arturi luulõtusõ vai mõnõ tõõsõ kirotaja võrokiilse luulõtusõ. Lugõmisõ pikkus ei või olla üle viie minodi. Egäst latsiaiast vai koolist oodõtas ekkä vannusõrühmä ütte ütsikut esinejät vai kooni viie liikmõga rühmä. Ütest koolist vai latsiaiast ei saa võistlusõlõ tulla mitu üte vannusõrühmä kavva.
Ossavõtmisõst pallõsõ kõrraldaja teedä anda Võro instituuti (tel 782 8753, 5691 6281 vai tiia.allas@wi.ee pääle nika ku 9.05.2022). Teedä tulõssi anda lugõja nimi, vannus, klass ja kuul vai latsiaid ni oppaja nimi, luulõtusõ vai pala päälkiri ja kirotaja.
Edimäne luulõlugõmisvõistlus peeti Sännän, Adsoni latsõpõlvõkülän, 1999. aastagal luulõtaja 110. sünnüaastapäävä avvus. Koroonakatsk sundsõ minevädse, XIX luulõlugõmisõ tegemä video-vormin ja võistlustöie jaos luudi Sännä trubaduuri nimeline Youtube’i kannal. Säält om no luulõt lugõma tulõjil hää iinkujjo võtta.
Ilolugõmispäävä kõrraldas Võro instituut, tugõva MTÜ Sänna Kultuurimõis, Eesti Kultuurkapital ja Rõugõ vald. Lähembät teedüst saa Võro instituudi kodolehe päält.
Võro Instituut
Sännä mõisa, kon tulõva kuu peetäs Adsoni Arturi nimelist luulõlugõmisõvõistlust. Pilt Sännä kultuurimõisa kodolehe päält.
