Soomõ sann ja sotsialistlik võistlus
1960. aastidõ lõpust, esieränis 1970. aastil naati egäl puul Eestin Soomõ sannu ehitämä. Tuu oll’ avvuküsümüs, et su asutusõn vai ettevõttõn om joba uma sauna pistü aetu.
Põllutehniga-ettevõttõl oll’ üts edimäidsi sannu Võrumaal. Pääle ihuharimisõ sai sannan muud kah tetä. Säälse tüüinemise ja külärahvas mäletäse lõbusit sannapidusit. Sääl võeti vasta küläliidsi, sanna renditi vällä tõisilõ.
Huvitaval kombõl kõlvas’ kotus är ka sotsialistlikun võistlusõn. Es olõ nii ammõtlik. Võrumaa põllutehniga-ettevõttõl oll’ sotsvõistlusõ paarilinõ kongi kavvõmbal Eestin, mu meelest Virumaal. 1970. aastal olli sõbra Parksepän külän, sanna küläliidsiraamatust võisõ näide kirotõdut hindamist lukõ: «Siist vii üten elutiile puhta perse, rõõmsa meele.» Ja pääle tuu salmikõsõ oll’ soovitu ka vahtsõt jõudu sotsialistlikus võistlusõs.
