Vana-Võromaa kultuurikuan om võrokõisi rahvarõivatarõ, kon saa nätä Vana-Võromaa rahvarõivit ja egäsugumast teedüst rahvarõividõ kotsilõ. Tarõn saa mängi ka esierälist mängo, miä juhatas huviliidsi poolõtõistku aastasaa tagodsõhe maarahva rõivamoodu maailma.
Tego om välläpanõgi perrä tettü kaardimängoga, kon piltküsümüse ja vastussõ näütäse rõivit ja näide tegemise ja kandmisõga köüdetüid kombit.
«Mäng olõ-i õnnõ suurilõ, ka noorõ ja latsõ võisi taad mängmä tulla,» seletäs Vana-Võromaa rahvarõividõ nõvvokua tegemiisi vidäjä Oja Vilve. «Mängen saa teedä, määndse omma seo kandi rahvarõivide nimetüse nii võro ku eesti keelen ja midä neo tähendäse. Tuud kah, kuna ja kuis naid pruugit om.»
Et mäng ei olõ väega lihtsä, om mängu mano tettü video, kon latsõ oppasõ mängo mängmä. Mäng kand nimme «Otsi ja lövvä!» ja sääl om 52 küsümüisi- ja vastussõkaarti. Küsümisekaardi pääl om osakõnõ rahvarõivast, miä tulõ pildi vai võrokeelidse nime perrä säältsamast tarõst üles otsi. Löütü as’a lugu om kirän vastussõkaardi pääl. Säält saa täpsele teedä, miä taa om, kuimuudu om taad tettü ja kuis kantu.
Oja Vilve seletäs, et mõnõ sõna omma eesti ja võro keelen õks väega tõistõ. Näütüses «hellätüs». Hellätüse omma rahvarõiva suursärgi suurõ sällävoldi.
Päält mängu mängmise saa rahvarõivatarõ teedüstahvlidõ päält ja Vana-Võromaa kihlkundõ kaardi päält ülekaehusõ mi paikkunna rahvarõivist. Vitriinen näge valikut ehtist, vöiest ja kirjuga kindist.
Rahvarõivatarõn tervütäse küläliidsi tegeläse 19. aastasaa tõõsõst poolõst: Rõugõ kihlkunna pidoliidsin rahvarõivin mannekeeni Katri ja Jakap.
Huvilidsõ saava nõvvo
Rahvarõivatarõ om üts osa Vana-Võromaa rahvarõividõ nõvvokuast. Nõvvokuan andas huviliidsile nõvvo, kuimuudu rahvarõivit kokko säädi, tetä ja kanda. Nõvvo saa kõigi katsa Vana-Võromaa kihlkunna – Harglõ, Kanepi, Karula, Põlva, Rõugõ, Räpinä, Urvastõ ja Vahtsõliina rahvarõividõ kotsilõ.
Ku välläpanõkit saa egäüts kultuurikua vallaolõki aol kaia, sis nõvvosaaminõ tulõ ette kokko leppü Oja Vilvega kas telefoni 554 1999 vai e-maili vilve.oja@gmail.com pääl.
Rahmani Jan
Rahvarõivatarõ mannekeeni Katri ja Jakap Rõugõ kihlkunna pidolidsin rahvarõivin. Rahmani Jani pilt
