12. lehekuul peeti Sännä kultuurimõisan Artur Adsoni nimelist ilolugõmisvõistlust. Seo oll’ jo 20. kõrd, ku Adsoni avvus võrokeelist luulõt loeti.
Sännäle oll’ luulõtuisi lugõma tulnu 28 Vana-Võromaa last – latsi oll’ Mõnistõst Vilustõni ja Põlvast Oravani. Ossa võtsõ kolm latsiaida ja 11 kuuli. Kõgõ inämb erinevit luulõesitüisi, kokko neli tükkü, oll’ Mõnistõ koolilatsilt, kedä juhend’ Asta Pazuhanitš.
22 etteastmisõ siän oll’ nii traditsiooniliidsi luulõesitüisi ku muusikaga kirät kava. Võistlusõ nimiautori luulõtust loeti ütel kõrral: Artur Adsoni «Väiku sõsar vellega» kõlasi Parksepä keskkooli 5. klassi opilasõ Laura Potteri ettekandõn (oppaja Ene Kärg). Autoriist olli seokõrd kõgõ popimba Panga Milvi, Contra ja Häniläne. Kolmõ etteastja luulõtusõ oll’ kirotanu timä imä.
Sännä om katõ suurõ võro kiränigu – Artur Adsoni (1889–1977) ja Juhan Jaigi (1899–1948) – sünnü- ja latsõpõlvõpaik. Edimäst kõrda tulti kokko võrokeelist luulõt lugõma 30. vahtsõaastakuul 1999 Sännä inneskiste koolimajja, kon Artur Adson latsõn elli ja koolin käve ni mink kirjeldüisist («Kui elli ma viil Sännä koolimajan», «Tol aol oll’ mulle kogu maailm Sännä») om täämbädses saanu võro luulõ klassika.
Seokõrdsõ ilolugõmispäävä kõrrald’ Võro instituut kuuntüün MTÜ-ga Sännä Kultuurimõis, tugõsiva Kauksi Ülle, Eesti Kultuurkapital ja Rõugõ vald.
UL
Võistlusõlõ tulnu latsõ, juhendaja ja muu huvilidsõ Sännä kultuurimõisa saalin. Rahmani Jani pilt
Ilolugõmisvõistlusõ tulõmusõ kullõjidõ hindamisõ perrä:
I kotusõ sai Võro Kreutzwaldi kooli 5. klassi opilanõ Lisete Ilves, kiä lugi Contra luulõtust «Lumemehe nõna» (oppaja Raili Leesalu).
II kotusõ sai Võro Sõlekese latsiaia keelepesarühmä latsõ Brianna Kõvatu, Ranar-Timo Valtu ja Brigitte-Eliise Piirimägi, kiä esitivä üten ummi oppajidõ Lea Sika (mängse flööti) ja Maia Päevalillega luulõkava «Kodo om mul Võromaal».
III kotussõ saiva Haani kooli opilasõ veli-sõsar Robin ja Liisbet Rõõmusoks (2. ja 7. klass), kiä esitivä Triin Rõõmusoksa luulõtusõ «Mõtsik mõtõlus» (oppaja Kersti Leit).
Ilolugõmisõ võitja Lisete Ilves Võro Kreutzwaldi koolist ni veli-sõsar Robin ja Liisbet Rõõmusoks Haani koolist. Rahmani Jani pildi
Brianna Kõvatu, Ranar-Timo Valtu ja Brigitte-Eliise Piirimägi Sõlekese latsiaiast üten oppajidõ Lea Sika ja Maia Päevalillega. Rahmani Jani pilt
Eripreemiä:
Kodokotussõ eripreemiä saiva Rõugõ kooli 2.–4. klassi poisi Artur Trumm, Eerik Org, Karl Kõva ja Raul Kuus, kes esitivä Anneli Lutsari, Evar Saarõ, Milvi Panga ja Johannes Siska luulõst kokko pant kava «Kevväi ja uma kodo» (oppaja Anneli Nagel).
Elävä esitüse preemiä sai Rõugõ latsiaia poiss Kaarel Kasuk, kiä lugi Milvi Panga luulõtust «Suvi» (oppaja Aire Taal).
Sännä mõisakeskuse eripreemiä saiva kolm etteastõt:
• Kääpä põhikooli 3. klassi opilanõ Kenert Hillep, kiä lugi Raimond Kolga luulõtust «Salm» (oppaja Jana Kähr);
• Orava kooli 5. klassi opilanõ Mireli Koddala, kiä lugi Häniläse luulõtust «Mälestüste mõtsa» (oppaja Ene Säinast);
• Vilustõ põhikooli 7. klassi opilanõ Maritte-Arianne Plaado, kiä lugi Leila Holtsi luulõtust «Maq saisa…» (oppaja Aasa Liiv).
Võro instituudi eripreemiä sai Võro Kreutzwaldi kooli 6. klassi opilanõ Joonas Koreinik, kiä lugi Jaan Kaplinski võro kiilde pantut tundmalda autori luulõtust «Tapliva lõuna puul liina…» (oppaja Helena Linnamäe).
Ütstõsõ tugõmisõ eripreemiä sai veli-sõsar Uku ja Ilo Laan (Väimälä latsiaid, Tilsi põhikooli 4. kl), kiä loi Triinu Laanõ kirotõt luulõtust «Mu tudukass Õiõ» (Uku oppaja Piia Peedel, Maivi Potter, Ilo oppaja Eve Hütt).
