Timahavadsõ «Teeme ära!» talgopäävä üts tsiht om tetä tutvust vahtsidõ naabridõga ja näid inämb uma kogokunnaga köütä. Om jo koroonaaol maalõ elämä tulnu vahtsõt rahvast ja perämädsel aol om vahtsõt rahvast mi maalõ tulnu ka Ukrainast.

Mu meelest om tutvassaaminõ väega hää mõtõ. Kuigi osa inemiisi eläs maal tuuperäst, et ei piäs naabridõga egä päiv läbi käümä ja saas umaette olla, om iks hää teedä, kiä midä mõist ja tege. Niimuudu mõistami api küssü ja pakku. Vai saami mõnikõrd niisama lobajuttu aia ja sannan kävvü.

Mi külän ommaki inämbüs säändse, kiä omma perämädse 25 aasta joosul siiä elämä tulnu. Peris põlitsid om õnnõ mõni ütsik. Alostus om kõigil üttemuudu: vast nii aasta jago ei olõ tõisiga suurõmbat läbikäümist. A sis saias tutvas ja tassakõistõ naatas ka läbi käümä. Mõni saa sõbras ja mõni lätt tüllü, nigu taa asi maailman iks käü. Määnestki väega kõrraperälist kogokunda meil tegünenü ei olõ, a tiiämi häste, kiä autot parandas, viinamarjo vai lilli kasvatas, mehiläidsi pidä, kost saa jahhu vai olt. Vai kiä kirotas luulõtuisi ja kiä luu vahtsit helüteossit.

Tast sis üleskutsminõ vannolõ olõjilõ: kutsu uma vahtsõnõ naabri talgopääväle! Äkki tulõgi ja võiolla saat hää vahtsõ tutva. Vai saat vähembält teedä, midä tõõnõ inemine tege.

Rahmani Jan,
Uma Lehe päätoimõndaja