Vällä om tulnu vahtsidõ võrokiilside koorilaulõ kogomik «Liigu’, liigu’, laulukõnõ!». Noodivihun om 33 laulu, mille siäst löüdvä hindäle lauluvarra nii miihi-, naisi- ku ka segäkoori.
Seo om joba tõnõ võrokiilside koorilaulõ kogomik ja kokko säetü laulõst, miä saadõti minevä aasta peetüle neländäle võrokiilside koorilaulõ ja -säädide konkursilõ. Võistlusõlõ tull’ pall’o häid koorilaulõ ja kogomik «Liigu’, liigu’, laulukõnõ!» and kuurõlõ võimalusõ pruuki näid ka aol, miä jääs katõ Uma Pido vaihõlõ.
Noodivihun om peris vahtsit koorilaulõ, niisama Vana-Võromaa kihlkundõ rahvalaulõ säädid, näütüses neländäl koorilaulõ konkursil pääpreemiä saanu Ritsingu Alo rahvalaulusääde. Segäkuurõ laulõst omma kogomikun konkursil edimädse kotusõ saanu laul «Kodutsõ’ tsirgu’» (muusiga: Kalmusõ Rein, sõna: Adsoni Artur), tõsõ kotusõ laul «Väiku sõsar vellega» (muusiga: Ritsingu Alo, sõna: Adsoni Artur), kats laulu, miä saiva konkursil kolmanda kotusõ: «Vikahtkaar» (muusiga: Normani Triin, sõna: Laanõ Triinu) ja «Katõkõsõ» (muusiga: Ermasti Margus, sõnad: Iheri Rihhard). Laulikun om ka konkursi kõgõ parõmb miihikuurõ laul «Ei olõ’ rahha» (muusiga: Ritsingu Alo, sõna: Iheri Rihhard). Lövvüs nii veidemb teedä ku ka laembalt tunnõtuidõ luujidõ luudut, näütüses Contra, Ilvesse Aapo, Klausi Kristo, Meistri Erki, Määri Andrese, Kaalepi Aini ja tõisi loomingut.
«Seon välläandõn om laulõ, midä om küländ lihtsä oppi ja opada, a säändsit laulõ kah, miä uutva suurõmbat pühändümist,» ütles lauluvihu nooditoimõndaja ja koorijuht Otsari Silja. «Vast andva vahtsõ võrokiilse koorilaulu vunki mano kooriliikmisele ülepää,» luut kogomigu kokkosäädjä Tigasõ Merike.
Kogomigu välläandja om Võro Selts VKKF. Kogomik mass 5 eurot ja seod saa osta Võro Instituudist vai telli Tigasõ Merikese käest (merike.tigas@wi.ee).
Kogomigu «Liigu’, liigu’, laulukõnõ!» vällänäütämine üten kontsõrdiga tulõ Mooste Elohelü aigu 15. hainakuul 2022 Moosten. Pääle vahtsõ noodivihu laulõ kuuld sääl tõisi vahtsõmbit võrokiilsit koorilaulõ. Ettekandja omma naisikuur Tempera ja segäkuur Hilaro Võrolt ja ansambli Miinus Seitse Tal’nast.
UL
