Pühäpäävä, 19. piimäkuul om Antsla keskliinan meistride päiv. Säänest umakandi käsitüü- ja söögi­meistride laatu peetäs joba viies kõrd. Et seo aastak om kuulutõt raamadu­kogo-aastas, saa tima­hava meistride pääväl nätä inämb raamatidõ ja kirändüsega köüdetüt.

Meistride päivä peetäs Antslan joba 2017. aastagast pääle. Tuud alosti herksä inemise ja seldsi, üten avitas ka Antsla vallavalitsus. Üts aastak jäi päiv koroona peräst pidämädä.

«Meil om säändsit väikeisi käsitüüliidsi ja umaette nokit­sõjit, noilõ mõtõldõn sai taa päiv tettüs,» seletäs Antsla valla arõngu­spetsiälist Joabi Kalev.

Meistride päiv om laada muudu perrepido, kon kaubõldas, omma tüütarõ, väiku kultuuriprogramm ja latsiala. Et timahavanõ aastak om kuulutõt raamadu­kogo-aastas, saa seokõrd inämb nätä raamadukogo ja umakandi luujidõga köüdetüt. Päävä üts osa om elläv raamadukogo, kon Antsla kandiga köüdedü kiräinemise kõnõlõsõ juttõ umast elost ja loomingust. Elävä raamadukogo tegemiisist omma lubanu ossa võtta Kersna Vahur, Kahro Marek, Keräneni Mika ja Zirgu Evi. Vällä tulõva ka kõik Antsla valla raamadukogo.

Seokõrd om meistride pääväl välän ka võro keele telk, kon Võro instituut näütäs ja müü võrokeelist kirändüst, kiränik Laanõ Triinu kõnõlõs umist raamatist, latsõ saava täütä tüülehti ja nime­uurja Saarõ Evar and prii- ja kotussõ­nimenõvvo.

Suurõmbilõ Antsla kandi kultuurihuviliidsilõ kõrral­dõdas päiv varrampa, 18. piimä­kuul, välläsõit paikligõ kirä­meistride ja kunstnigõ rato pääle. Plaanitas kävvü Kangro Bernardi, Heibergi Marie ja Pärsimäe Karliga köüdetüin kotussin ja lõpõta rännümehe Allasõ Ülari man.

Joabi Kalev seletäs, et ku alos­tusõn pidi meistriid pääväle kutsma ja otsma, sis no omma nä häämeelega esi platsin. Kauplõmispäiv olõ-i ka väega pikk, tegemise mahusõ är nelä tunni sisse. «Üts mõtõ oll’ meistride päävä kõrraldajil alostusõn sääne, et vast nakasõ mi kandi meistre inämb kuuntüüd tegemä. Tuu ei olõ väega suurõ huuga käümä lännü, a midägi õks tetäs kah,» seletäs Joabi Kalev.

Ligembät teedüst meistride päävä kotsilõ saa internetist aadrõsi facebook.com/meistritepaev päält.

Rahmani Jan

Joabi Kalev Antsla keskliinan. Meistride päiv peetäs timä sälä takast paistuvan pargin. Rahmani Jani pilt